Шинээр дагаж мөрдөж байгаа хуулиудын талаар мэдээлэл

Зэвсэгт хүчний Хуурай замын цэргийн командлал нь бие бүрэлдэхүүндээ 7 хоног тутамд цэргийн алба болон хувь хүний хөгжилд чиглэсэн сургалтуудыг тогтмол  зохион байгуулдаг уламжлалтай билээ. Энэ удаад 2022 оны нэгдүгээр сарын 1-ний өдрөөс эхлэн дагаж мөрдөх хуулиудын талаар мэдээлэл хүргэж, тэр дундаа Хөдөлмөрийн тухай хуульд шинээр орсон өөрчлөлт, онцлогийн талаар тус командлалын Хуулийн офицер, ахлах дэслэгч Д.Отгонгэрэл мэдээлэл өгсөн юм.

Мэдээллийн эхэнд Удирдлага, төлөвлөлтийн хэлтсийн дарга, хурандаа Д.Өлзийбаяр бие бүрэлдэхүүнд шинэ оны мэнд хүргээд “Хуурай замын цэргийн командлалын 2022 оны зорилт бол “Мэдлэг, дадлага, чадварт”-т суурилсан байхад чиглэж байна. Энэ бол Хуурай замын цэрэг хэмээх малгай дор алба хааж байгаа генерал, офицер, ахлагч, ажилтан албан хаагч, цэргийн гэрээт болон хугацаат албаны дайчид бүхэнд хамаатай. Бид цэргийн алба руу чиглэсэн сургалт бэлтгэлээс гадна хувь хүний хөгжил, хууль эрх зүйн мэдлэгийг дээшлүүлэхэд улам анхаарна” гээд нэгдүгээр сард зохион байгуулах төлөвлөгөөт ажил, арга хэмжээний талаар өгүүлэв.

Үргэлжлүүлэн ахлах дэслэгч Д.Отгонгэрэл Хөдөлмөрийн тухай хуулийн шинэчилсэн найруулгын талаар мэдээлэл хүргэхдээ “2018 оны гуравдугаар сард анх УИХ-д өргөн мэдүүлснээс хойш гурван жилийн хугацаанд хэлэлцэгдсэн энэ хуулийн шинэчилсэн найруулга 2022 оны нэгдүгээр сарын 1-нээс хэрэгжиж эхлээд байна.  Хөдөлмөрийн харилцаанд оролцогчдын хувьд Үндсэн хуулийн дараа эрэмбэлэгдэх энэ хууль 13 бүлэг 160 гаруй зүйл заалттай. Үндсэн хуулиар олгосон ажил хөдөлмөр эрхлэх язгуур эрхээ хангуулах Хөдөлмөрийн тухай хуульд шинээр орсон болон зарим онцлог заалтаас дурдвал ажил олгогч ажилд орох гэж байгаа хүн болон ажилтнаас мөнгө, үнэ бүхий зүйл авахыг хориглоно, уул уурхайд ажиллагсад 14 хоног ажиллаж, 14 хоног амарна, ээлжийн үндсэн амралтын хугацаа ажлын 15 өдөр байна, ажилтанд оноох сахилгын шийтгэлийг таван хэлбэртэй болгосон гэв. Энэхүү таван хэлбэрт нэгд, хамт олонд хэлэхгүй хаалттай сануулах, хоёрдугаарт, хамт олны дунд нээлттэй сануулах, гуравдугаарт, үндсэн цалинг гурван сар хүртэлх хугацаагаар 20 хүртэлх хувиар бууруулах, дөрөвдүгээрт, албан тушаал бууруулах, тавдугаарт, ажил олгогчийн санаачилгаар хөдөлмөр эрхлэлтийн харилцааг цуцлахаар тусгасан.  Сахилгын арга хэмжээний дээрх таван заалтыг заавал үе шат дараалан биш, ажил олгогч өөрөө сонгож хэрэглэж болно. Ажил олгогч нь ажилтны зөрчилд тохирсон сахилгын шийтгэл оногдуулна” гээд энэ хуулийн гол онцлог нь ажил олгогч, ажилтан хоёрын харилцаа зөвшилцлийн шинжтэйгээрээ чухал гэлээ. Мөн Зэвсэгт хүчинд ажиллаж байгаа энгийн ажилтан алба хаагчид шинээр мөрдөгдөж байгаа Хөдөлмөрийн тухай хуулийн шинэчилсэн найруулгад нийцүүлэн Хөдөлмөрийн гэрээгээ шинэчлэх шаардлага үүссэн талаар ч ярилаа гэж Хуурай замын цэргийн командлалаас мэдээллээ.