Монголд анх удаа "Road to ONE 2022" тулааны шоу нэвтрүүлгийг албан ёсны эрхтэйгээр бүтээнэ

"Road to ONE Mongolia 2022" Монголын анхны албан ёсны эрхтэй тулааны шоу нэвтрүүлгийг бэлтгэхээр “Монгол ТВ” телевизийн Гүйцэтгэх захирал Г.Бат-Эрдэнэ, “Степпелинк Холдинг” ХХК-ийн Үйл ажиллагаа хариуцсан захирал Ц.Одонтуяа нар хамтран ажиллах санамж бичигт гарын үсэг зурлаа.

"Монгол ТВ" телевиз шинэ бүтээлээрээ тулааны спорт сонирхогчиддоо бэлэг барих гэж байна.  Энэ удаа “Степпелинк Холдинг” ХХК-тай  хамтран "Road to ONE Mongolia 2022" тулааны тэмцээнийг шоу нэвтрүүлэг хэлбэрээр бүтээхээр болжээ.

“Road to ONE Mongolia 2022” тулааны ялагч “One Championship” холбоотой 100.000 ам.долларын гэрээ байгуулна

“Road to ONE” тэмцээн нь тулааны урлагаар хичээллэдэг, дэлхийн тавцанд гарах чин эрмэлзэлтэй залуусаас нэг шилдэг тулаанчийг шалгаруулж, “One Championship” тулааны холбооноос 100.000 ам.долларын гэрээгээр шагнадаг гэдгээрээ онцлогтой. 

 “Road to ONE Mongolia 2022” төслийн удирдагч Д.Золбоо

Монгол Улс “Road To ONE” тулааны тэмцээнийг зохион байгуулж байгаа хэд дэх улс болж байгаа вэ? Тэмцээний цар хүрээний талаар?

“One Сhampionship” нь дэлхийн 150 оронд шууд дамжуулагддаг, хамгийн хурдацтайгаар өсөж буй дэлхийд нэртэй шилдэг тулааны холбоо юм. Харин “Road to ONE” бол Азийн улсуудын шинэ талент буюу тулааны урлагийн шинэ залуучуудыг гаргаж ирэх зорилготой томоохон тэмцээн. Цар хүрээний хувьд “Road To ONE”  тэмцээнээр дамжиж гарч ирсэн тамирчид тухайн улсынхаа нэр хүндийн илэрхийлэл болж, “One Championship” холбоотой гэрээ хийснээр дэлхийд данстай тамирчид болдог. Өмнө нь 3 тивийн улс орнуудад 16 удаа амжилттай зохион байгуулагдаж байсан бол манай улс Төв Азидаа хамгийн анхны улс нь болж байгаа гэдгээрээ онцлогтой. “Степпелинк Холдинг” ХХК-ийн хувьд 2 жилийн өмнөөс гэрээ хэлцэл хийж эхэлсэн. Нилээд олон удаагийн уулзалт хийж, холбогдох шаардлагуудыг хангасны эцэст 2022 оныг ийнхүү албан ёсны эрхтэй тулааны тэмцээнээр эхлүүлэхээр болж байна. Цаашид “One Сhampionship” тэмцээнийг Монголд нутагшуулах том төсөл хөтөлбөрөө хэрэгжүүлэхээр ажиллаж байна.  

Тулааны тамирчдаар дамжуулан үзэгчдэд юуг илэрхийлэхийг зорьдог вэ?

“One Сhampionship”-ийн бусад тулааны холбоонуудаас ялгарах онцлог нь түүхийг илүү харуулдаг. Ялангуяа тухайн тамирчин ямар орчноос, ямар гэр бүлээс, ямар соёлоос гаралтай вэ гэдгийг гаргаж ирдэг. Азийн улсуудын хувьд соёл өөр ч олон мянган жилийн тулааны урлагийн түүхтэй улсууд байдаг. Тиймдээ ч тухайн тамирчны ард байгаа өв соёл, улс орных нь уламжлалыг харуулахыг зорьдог. Нүүдэлчин Монголчууд эрт дээр үеэс л гарамгай дайчидтай гэдгээрээ дэлхийд гайхагддаг байсан бөгөөд энэ нь бидний түүхэнд гүн шингэсэн. Иймд, бид түүх, соёл, уламжлалаа шоу нэвтрүүлгээрээ дамжуулан дэлхий нийтэд үзүүлэхийг зорьж байгаа. Мөн Монгол Улсаа төлөөлөн “One Сhampionship”-д гарах цорын ганц ялагчаа дэлхийд алдраа мөнхөлсөн, амжилт дүүрэн тамирчин болно гэдэгт итгэлтэй байна.

Энэхүү тулааны шоу нэвтрүүлэгт оролцогчдод ямар шаардлага тавих вэ?

Монголын анхны албан ёсны эрхтэй тулааны шоу нэвтрүүлэгт маань өмнө нь “One Championship”, UFC-д оролцож байгаагүй тулаанчид оролцоно. Үүнд, сонирхогчдын болон дотоодын тэмцээн хамаарахгүй. Өөрөөр хэлбэл тулааны урлагаар хичээллээд хүчээ сорихыг хүсч байгаа хүн бүрт нээлттэй гэж ойлгож болно. Насны хязгаар байхгүй. Жингийн хувьд одоогийн байдлаар 4 жинд тамирчид оролцуулахаар төлөвлөж байна.

"Road to ONE Mongolia 2022" тулааны шоу нэвтрүүлэг ямар зарчмаар явагдах вэ?

Эхний ээлжид “Монгол ТВ” телевизтэй хамтран реалити шоу нэвтрүүлэг хийнэ. Улмаар бид шалгарсан хүмүүсийн дунд томоохон тулаан зохион байгуулж, ялагчаа тодруулна. Тулааны хугацаанд маш олон шалгуур дамжин ялагчаа тодруулах учраас Азийн хэмжээний од болох боломжтой.  Мөн ялагч маань “One Championship” холбоотой 100.000 ам.долларын гэрээ хийх бөгөөд Монголын тамирчдаас ийм хэмжээний гэрээ хийсэн тохиолдол маш цөөхөн. Үүнээс гадна “One Championship” холбоотой албан ёсны хамтын ажиллагаа эхлүүлсэн учраас тэмцээнд оролцогч залуучуудад маань маш том боломж гарна гэдэгт бид итгэлтэй байгаа.