SXCOAL: Ганц мод боомтоор нэвтэрсэн 2021 оны 12 сард долдугаар сараас доош түвшинд хүрсэн

2021 оны 12 дугаар сард Гашуунсухайт-Ганцмод боомтоор нэвтэрсэн Монголын нүүрс тээврийн автомашины тоо долоодугаар сараас хойших доод түвшинд хүрснийг “SXCoal” мэдээллээ.

12 дугаар сард өдөрт дунджаар нүүрс тээврийн 100 автомашин гарсан байна. Харин 12 дугаар сарын 30-нд 78 тээврийн хэрэгсэл л хилээр гарчээ.

ӨМӨЗО-д “коронавирус”-ийн халдварын тархалт нэмэгдсэнтэй холбоотойгоор 12 дугаар сарын гурванаас хойш боомтоор нэвтрэх автомашины тоог өдөрт 100 болгосон юм. Хэдий тийм боловч сүүлийн өдрүүдэд Хөлөнбуйрт халдварын тархалт нэмэгдээгүй ч Ганцмод боомтын удирдлагууд боомтоор нэвтрэх тээврийн хэрэгслийн тоог хэзээ нэмэгдүүлэх нь тодорхойгүй байна.

Монголоос нийлүүлэлт буурсантай холбоотойгоор БНХАУ-д коксжих нүүрсний үнэ өсөөд байгаа аж. Түүнчлэн Цагаанхадаас Ганцмод хүртэлх тээвэрлэлтийн зардал огцом өссөн байна. 11 дүгээр сарын эцсээр тонн тутам 300 юань байсан бол 12 дугаар сарын эцэст 700-850 юань болжээ.

Нөгөө талаас БНХАУ-ын нүүрсний гол нийлүүлэгч Индонез улс нэгдүгээр сард нүүрсний экспортоо зогсооно гэж мэдэгдсэн байна. Тус улсад дотоодод нь эрчим хүч хомсдох эрсдэл үүссэнээр дээрх шийдвэрийг гаргажээ. Нэгдүгээр сард экспортоо зогсоохгүй бол нийтдээ 10.8 гигаватт хүчин чадалтай 20 цахилгаан станцын үйл ажиллагаа зогсохоор байна. Өөрөөр хэлбэл 10 сая хэрэглэгч гэрэл цахилгаангүй болох юм. Нүүрсний экспортоо зогсоох асуудлыг Индонезийн Засгийн газар нэгдүгээр сарын таванд дахин хэлэлцэх юм байна.