Сансрын аюултай биет дэлхийд ойртож ирэхийг анхаарууллаа

2029 оны 4-р сарын 13-нд Апофис хэмээн нэрлэсэн астероид /сансрын биет/ дэлхий рүү ойртож ирэхийг ОХУ-ын  Онцгой байдлын албанаас анхаарууллаа.

ОХУ-ын Онцгой байдлын яамны Иргэний хамгаалалт, онцгой байдлын бүх Оросын судалгааны хүрээлэнгийн мэдээлснээр 2029 оны хавар дэлхийд аюултай хэмжээнд ойртож ирэх энэхүү астероид нь бараг 400 метр диаметртэй, 30 сая  шахам тонн жинтэй ажээ.  Энэхүү астероидыг  Апофис гэж таамаглаж байна. 

Урьдчилсан тооцоогоор сансрын биет дэлхийд бараг 38.4 мянган километр ойртоно. Энэ нь геостационар хиймэл дагуулыг тойрог замд байрлуулахтай бараг ижил зай юм.

Болзошгүй мөргөлдөөн
Апофисын дэлхийд ойртох хурд секундэд 7.42 км байх болно. 393 метрийн диаметртэй, 27 сая орчим тонн жинтэй сансрын биет дэлхийн гадаргуутай мөргөлдөх үед ялгарах энерги нь 1717 мегатонн байх бөгөөд энэ нь ЗХУ-ын 1961 онд туршсан дэлхийн хамгийн хүчирхэг халуун цөмийн бөмбөгийн  энергиэс 30 дахин их юм. 

1717 мегатон
 Апофис астероидын дэлхийн гадаргуутай мөргөлдөх үед ялгарах энерги 1717 мегатон байх болно.
Тооцож буйгаар унасан газраас 10 км-ийн радиуст газар хөдлөлтийн хүч Рихтерийн шаталбараар 6.5 баллд хүрч, салхины хурд секундэд 790 метрээс багагүй байна.

Бусад астероидууд

НАСА-гийн мэдээлснээр 2022 оны 1-р сард аюултай байж болзошгүй хоёр астероид дэлхий рүү ойртоно.

Тэдний эхнийх нь буюу 2013 YD48 нь Big Ben-тэй ойролцоо хэмжээтэй, 104 метр орчим өргөнтэй бөгөөд нэгдүгээр сарын 11-нд  манай гарагаас 5.6 сая километрийн зайтай  өнгөрнө.

Хоёр дахь нь буюу 7482 YD48 нь Америкийн Empire State Building-ээс хоёр дахин том бөгөөд нэгдүгээр сарын 18-нд дэлхийд 0.013 астрономын нэгж /au/ зайд ойртоно. /Тайлбар: AU нь одон орон судлалын зайн хэмжилтийн нэгж бөгөөд ойролцоогоор Дэлхийгээс Нар хүртэлх дундаж зайтай тэнцэнэ. Одоогоор  149,597,870,700 метртэй тэнцэнэ гэж тооцож байна. /

Үүнээс гадна өнгөрсөн арванхоёрдугаар сард НАСА Эйфелийн цамхаг шиг хэмжээтэй 4660 Nereus астероид дэлхий рүү нисч байгааг анхааруулсан. Астероидыг 1982 онд нээсэн. Энэ нь манай гаригт ямар ч аюул занал учруулахгүй гэж эрдэмтэд тайлбарлав. Цагт 23 мянган км-ийн хурдтай сансрын биет дэлхийгээс нэлээд хол зайд өнгөрөх болно. 

Эрдэмтдийн санал бодол
ОХУ-ын ШУА-ийн Сансар судлалын хүрээлэнгийн захирал  Анатолий Петррукович дэлхийг устгах чадвартай солир ямар байх ёстой талаар "багадаа километрийн хэмжээтэй огторгуйн биетүүд л үүнийг хийж чадна" гэжээ.

Тунгусын солир гэх мэт том  биетүүд дэлхий дээр хэдэн зуун жилд нэг удаа унаж сүйрэлд хүргэдэг. Хэрэв бид астероидуудын улмаас дэлхий дээрхи сүйрлийн нөлөөллийн талаар ярих юм бол энэ нь  сая жилд л нэг удаа тохиолддог. Ийм том биетүүд алсаас харагддаг, бид тэдний тойрог замыг урьдчилан тооцоолж, дэлхийд хэр ойртож байгааг тодорхойлох боломжтой.

Жил бүр дэлхий дээр хэд хэдэн жижиг солир унадаг бөгөөд ихэнхдээ далайд унадаг. Учир нь  дэлхийн гуравны хоёрыг далай эзэлдэг. Штернбергийн одон орон судлалын хүрээлэнгийн судлаач Владимир Сурдин тэднийг жижиг хэмжээтэй учир Дэлхийд хүрэхээс хэдхэн цагийн өмнө илрүүлэх боломжтой гэж нэмж хэлэв.

Харин НАСА-гийн дэд тэргүүн Томас Зурбухен ойрын 100 жилийн хугацаанд эрдэмтдийн мэдэж байгаа астероидуудтай дэлхий мөргөлдөх эрсдэл байхгүй гэж мэдэгдэв. Түүний хэлснээр одоогийн байдлаар 140 ам.метрээс дээш талбайтай сансрын биетүүдийн 40 орчим хувь нь тодорхой, харин  үлдсэн 60 хувь нь олдоогүй байгаа аж.

Дидим Б
2021 оны арваннэгдүгээр сарын 24-нд АНУ-ын Агаарын цэргийн хүчний Ванденберг баазаас "Давхар астероидыг дахин чиглүүлэх туршилт" (DART) хийх сансрын хөлөг бүхий Falcon 9 пуужин хөөргөсөн юм. DART нь   Дидим В астероидтой мөргөлдсөнөөр  замынх нь чиглэлийг өөрчилнө гэж тооцож байгаа юм.  Тиймээс  дэлхийтэй мөргөлдөх боломжгүй болно гэсэн үг.

Дидим Б астероид нь өөрөө дэлхийд аюул занал учруулахгүй бөгөөд түүний зам мөрийг өөрчлөх нь манай гаригт аюул учруулахгүй гэсэн үндэслэлээр  НАСА-аас цохилтын бай болгон сонгосон юм.  DART тухайн астероидод наймаас есөн сарын дараа хүрэх ёстой.
Дидим Б-ийн диаметрийг 160 метр гэж тооцдог. 

Эх дэлхийгээ  хамгаалах нь 

"Роскосмос"  корпорацийн тэргүүн Дмитрий Рогозин дэлхийг сансрын аюулаас хамгаалах технологи бий болгох шаардлагатай гэж мэдэгдэв.

Сансар огторгуйгаас ямар нэгэн биет бидний бүх төлөвлөгөөг нэг цохилтоор дуусгахгүй гэдгийг хэн ч баталж чадахгүй. Энэ нь манай гаригийг иймэрхүү аюулаас "бултах" боломжтой технологитой байх ёстой гэсэн үг юм.

2021 оны 4-р сард НАСА сансрын биеттэй мөргөлдөхөөс зайлсхийх, хохирлыг бууруулах төлөвлөгөө гаргахын тулд астероид-дэлхийтэй мөргөлдөх загварчлалаар  сургуулилт хийсэн. Эрдэмтдийн үзэж байгаагаар ирээдүйд дэлхийг сансрын биеттэй мөргөлдөх магадлал 100-д ​​1-ээс багагүй байх тоолонд ийм сургуулилт хийж байх аж. 

Эх с урвалж: Лента. ру