Ким Чен Ун 2021 оныг "Бахархалт ялалтын жил" гэж нэрлээд 2022 оныг "агуу тулааны жил" гэж тодотгов

БНАСАУ-ын удирдагч Ким Чен Ун өнгөрсөн 2021 оны улс орны үр дүнгээ "Бахархалт ялалтын жил" хэмээн нэрлэснийг  Родон Синмун сонинд иш татан мэдээлэв.

Тэрээр хэлсэн үгэндээ эдийн засгийн хэд хэдэн ололт амжилтад анхаарал хандуулж, үндэсний сэргэн мандалтын шинэ үндсэн чиглэлийг томъёолжээ.  Үүнээс гадна Ким Чен Ун 2021 оныг үндэсний хөгжил цэцэглэлтийн түүхэнд тэмдэглэн үлдээх ёстой "Бахархалтай ялалтын жил" гэж нэрлэсэн байна.

Түүнчлэн Солонгосын Хөдөлмөрийн Намын Төв Хорооноос коронавирусын тахлын нөхцөлд эдийн засгаа тогтворжуулах арга замаа тодорхойлж, идэвхтэй  хэрэгжүүлж буйгаа онцлон тэмдэглэсэн тайланг нийтэлжээ. Тайланд  мөн хилийн боомтыг хаах талаар авч хэрэгжүүлж буй арга хэмжээг онцлон дурдсан байна. Ийм алхмууд нь улс орны эдийн засгийн бие даасан хөгжилд ашиг тустай гэдгийг баримт бичгийг зохиогчид тэмдэглэжээ.

Түүнчлэн БНАСАУ-ын удирдагч Ким Чен Ун оны сүүлчээр болсон намын их хурал дээр хэлсэн үгэндээ тус улсын дотоод асуудлуудыг дурдаж, 2022 онд болох "агуу тулаан"-д ялалт байгуулах шаардлагатайг мэдэгджээ. 

Ерөнхий нарийн бичгийн даргын хэлсэн 2022 оны тэр "тулаан" нь  "социализмыг бүх талаар хөгжүүлэхийн төлөө, Хойд Солонгосын агуу их ард түмэн, хайртай хойч үеийнхнийхээ төлөө тууштай эхлүүлж, өчүүхэн ч сатааралгүйгээр  заавал ялах ёстой баатарлаг үйл юм" гэдгийг тайланд тодотгожээ. 

Мөн Ким Чен Ун нам болон Хойд Солонгосын ард түмэн хамтдаа энэ онд дахин хамгийн том ялалтаа байгуулна гэдэгт итгэлтэй байгаагаа илэрхийлсэн байна. 

Харин Умард Солонгосын удирдагчийн ерөнхий дүгнэлт бүхий энэхүү тайланд  АНУ эсвэл Өмнөд Солонгосыг дурдаагүй гэдгийг эх сурвалж мэдээлжээ.