Хонконгийн сөрөг хүчний хэвлэлийн удирдлагуудыг суллахыг уриалжээ

АНУ-ын Төрийн нарийн бичгийн дарга Энтони Блинкен Хонконгийн сөрөг хүчний “Stand News” цахим хэвлэлийн хуучин болон одоогийн удирдлагууд болох долоон хүнийг баривчилсанд санаа зовниж буйгаа илэрхийлээд, тэднийг суллахыг уриалжээ.

Түүнийг мэдэгдлийг Төрийн департаментын хэвлэлийн алба нийтэлсэн байна.

"Хонконгийн чөлөөт, хараат бус хэвлэл мэдээллийн хэрэгслүүдийг хавчахаа зогсоож, шударга бусаар хоригдож, хариуцлага хүлээсэн тэдгээр сэтгүүлч, хэвлэл мэдээллийн удирдлагуудыг нэн даруй суллахыг бид БНХАУ болон Хонконгийн эрх баригчдад уриалж байна" гэж Э.Блинкен мэдэгджээ.

"Хараат бус хэвлэл мэдээллийн хэрэгслүүдийн “амыг тагласнаар” БНХАУ болон орон нутгийн эрх баригчид Хонконгийн итгэл үнэмшлийг алдагдуулж байна” гэж АНУ-ын Төрийн нарийн бичгийн дарга онцлон тэмдэглэсэн байна.   

12 дугаар сарын 29-нд цагдаагийн зуу гаруй ажилтан шүүхийн шийдвэрийн дагуу “Stand News” сонины байранд нэгжлэг хийж, компьютер, бичиг баримт, сэтгүүл зүйн материалуудыг хураан авчээ. Үүний зэрэгцээ тус цахим хэвлэлийн хуучин болон одоогийн долоон удирдлагыг саатуулж, ажлын байранд нь нэгжлэг хийсэн байна. Тэднийг нийгмийг үзэн ядалт, хүчирхийлэлд өдөөн хатгах зорилготой материал нийтлэхийг завдсан хэрэгт сэжиглэж байгаа аж.

2014 онд байгуулагдсан “Stand News” бол эрх баригчдын үйл ажиллагааг шүүмжилдэг хятад хэлээрх мэдээллийн цахим хуудас бөгөөд 2019 онд Засгийн газрын эсрэг өрнөсөн олон нийтийн эсэргүүцлийн жагсаалд оролцогчдыг дэмжиж байжээ.

Эх сурвалж: Montsame.mn