Хоккейн залуучуудын ДАШТ-ийг цар тахлын улмаас дундаас нь цуцаллаа

Канадад болж байсан шайбтай хоккейн залуучуудын ДАШТ-ийг дундаас нь цуцалжээ. Тэмцээнд оролцож байсан АНУ, ОХУ, Чехийн шигшээ багийн тамирчдаас халдвар илэрсний дараа Олон улсын хоккейн холбооны зөвлөл хуралдаж, эцсийн шийдийг гаргасан байна. Оролцогч багуудаас халдвар гарч эхлэхэд зохион байгуулагчдын зүгээс тэмцээнээ хэвийн явуулсаар дуусгахын тулд багагүй хүчин зүтгэл гаргасныг дурдах хэрэгтэй. Тухайлбал, халдвар илэрсэн улсуудын тоглолтыг цуцалж, эсрэг багт нь техникийн хожил өгч байсан юм. Гэвч яваандаа халдварт өртсөн багийн тоо нэмэгдэх хандлагатай болсон учир аргагүй цуцлах шийдвэр гарчээ.  

Өчигдөр яг юу болов?

ДАШТ-д оролцогчдоос авч буй шинжилгээний хариу эерэг гарах нь эрс нэмэгджээ. Халдварын улмаас тоглолт цуцлагдсан анхны тохиолдол мягмар гаригийн шөнө болж АНУ-Швейцарийн /АНУ-ын тоглогчид халдвар авсны улмаас/ тоглолт цуцлагдсан. Мөн Чехийн баг Финляндтай /Чехийн тоглогчид халдвар авсан тул/, ОХУ Словактай тоглосонгүй /ОХУ-ын багт халдвар гарсан/.

-ОХУ-ын багийн лидер Матвей Мичковын хариу эеэрэг гарав. Гэсэн ч агент, аав хоёр нь хүлээн зөвшөөрсөнгүй. Санаатайгаар хийсэн үйлдэл гэж үзэж байгаагаа илэрхийлсэн. Тоглогчид одоогоор ямар нэг шинж тэмдэг илрээгүй байна.   

-Тоглогчид хотхон маягаар биш, ердийн байдлаар зочид буудлуудад байрлаж байсан нь эрсдлийг нэмэгдүүлсэн гэж үзсэн байна.

-ОУХХ-ны ерөнхийлөгч Люк Тардифф тэмцээнийг хойшлуулах шийдвэрийг албан ёсоор танилцуулсны дараа “Тэмцээнийг ирэх онд, магадгүй зун ч юм уу үргэлжлүүлнэ” гэжээ