2021 онд дэлхий дахинд болсон онцлох  үйл явдлууд

 Улирч буй 2021 онд дэлхий дахинд болсон гол  болон онцлох үйл явдлыг сар сараар товчлон хүргэж байна.  

НЭГДҮГЭЭР САР: Доналд Трампыг дэмжигчид  Капитолыг нураах шахав

• -2021 оны нэгдүгээр сарын 1-нд Их Британи Европын холбооноос  эцэслэн гарлаа. Их Британи 2020 оны 1-р сараас хойш ЕХ-ны гишүүн байхаа больсон ч шилжилтийн үед нэгдсэн зах зээлд үлдэж, ЕХ-ны дүрэмд түр зуур захирагдаж байсан юм. Ингэснээр тус улс ЕХ-оос бүрмөсөн гарав.
• -Нэгдүгээр сарын 6-нд АНУ-ын нийслэл Вашингтон хотод Доналд Трампыг дэмжигчид  үймээн гаргаж, Капитолын ордон руу нэвтэрч барилгыг эзлэн авч, аюулгүй байдлын албаныхан сенатор, конгрессын гишүүдийг яаралтай нүүлгэн шилжүүлэх арга хэмжээ авч байв. Үймээний улмаас наад зах нь таван хүн амиа алдаж, олон арван цагдаа шархдаж, зарим нь эмнэлэгт хүргэгджээ. Орон нутгийн эрх баригчид АНУ-ын нийслэлд хөл хорио тогтоожээ. Үүнээс гадна долоо хоногийн дараа АНУ-ын Төлөөлөгчдийн танхим хоёр дахь удаагаа Дональд Трампт импичмент зарласан юм.
• -Нэгдүгээр сарын 20-нд АНУ-ын 46 дахь Ерөнхийлөгч болсон Жо Байдены тангараг өргөх ёслол болов.

ХОЁРДУГААР САР: Мьянмарт цэргийн эргэлт гарав

• -2-р сарын 19-ний байдлаар биткойн бүх цаг үеийн дээд амжилтаа шинэчилсэн. Криптовалютын капиталжуулалт 1 их наяд долларт хүрсэн байна. Тесла-гийн  Bitcoin-д оруулсан хөрөнгө оруулалт нь Америкийн компанид нэг тэрбум гаруй долларын ашиг авчирсан.
• -Хоёрдугаар сарын эхээр Мьянмарт цэргийн эргэлт гарч, засгийн газрын тэргүүн Аун Сан Су Чи, Ерөнхийлөгч Вин Миинг нарыг саатуулж, албан тушаалаас нь огцруулжээ. Тус улсад нэг жилийн хугацаатай онц байдал зарлаад байна. Ингэснээр тус улсад  ардчилал үндсэндээ үгүй болов.

ГУРАВДУГААР САР: Бенжамин Нетаньяхугийн эрин үе дуусав

• -Гуравдугаар сарын эхээр Францын экс Ерөнхийлөгч Николя Саркози авилга авсан, шүүгчид авилга өгөхийг завдсан хэрэгт буруутай нь тогтоогдсон. Саркози буруутгаж буй дээрх  үндэслэлүүдийг  үгүйсгэж, улс төрийн өрсөлдөгчдийн дарамт шахалт гэж нэрлэжээ.
• -Гуравдугаар сарын сүүлчээр  Израиль сүүлийн хоёр жилд Кнессет/ парламент /-ийн дөрөв дэх сонгуулиа хийлээ. Сонгуульд 37 нам, эвсэл оролцсон. Гэсэн хэдий ч улс төрийн ямар ч эвсэл, эвсэл шийдэмгий ялалт байгуулж байгаагүй. Израилийн Ерөнхий сайд дахин засгийн газар эвсэл байгуулж чадсангүй. Ингэснээр Ликуд намын лидер Бенжамин Нетаньяхугийн засгийн газар байгуулах бүрэн эрхийн хугацаа дууссан. Улмаар Израилийн парламент ганцхан саналын илүүтэйгээр Яир Лапид, Нафтали Беннетт тэргүүтэй найман намаас бүрдсэн  эвслийн  шинэ Засгийн газар байгуулахыг дэмжив. Ийнхүү сүүлийн 12 жил засгийн газрын тэргүүнээр ажилласан Бенжамин Нетаньяхугийн эрин үе дууслаа.

ДӨРӨВДҮГЭЭР САР: Английн хатан хаан Элизавет бэлэвсрэв

• - Дөрөвдүгээр сарын 21-22-нд дэлхийн уур амьсгалын өөрчлөлттэй тэмцэх, ялангуяа хүлэмжийн хийн ялгарлыг бууруулахад зориулсан олон улсын уур амьсгалын дээд хэмжээний уулзалт болов. Коронавирусын цар тахлын улмаас 40 орны төрийн тэргүүн, засгийн газрын тэргүүн нар оролцсон дээд хэмжээний уулзалтыг цахимаар зохион байгууллаа.
• -Дөрөвдүгээр сарын дундуур Чех улс 2014 онд цэргийн зэвсгийн агуулахад болсон дэлбэрэлтэд ОХУ-ын тагнуулынхан холбоотой байж болзошгүй гэсэн сэжигтэй холбогдуулан ОХУ-ын Элчин сайдын яамны 18 ажилтныг албан ёсоор хөөв. Үүний хариуд ОХУ Москва дахь Чехийн ЭСЯ-ны 20 ажилтныг “персона нон грата” хэмээн зарлаж, тус улсаас гарахыг тушаажээ.
• -Мөн энэ сард  Английн хатан хаан Элизаветын нөхөр Эдинбургийн гүн, хунтайж  Филипп  99 насандаа таалал төгсөв. Тэрбээр Грект төрсөн  бөгөөд Лондонд коллежид сурч байхдаа Элизабеттай танилцаж улмаар 1946 онд Филип хаанаас хаан ширээг залгамжлагч бүсгүйтэй гэрлэх зөвшөөрөл хүсч байсан гэдэг.

ТАВДУГААР САР: Беларусийн эрх баригчид  юуны учир онгоц албадан буулгав

• -Тавдугаар сарын сүүлчээр Беларусийн эрх баригчид Ryanair компанийн онгоцыг албадан буулгав. Nexta сувгийн редактор асан Роман Протасевич болон түүний найз охин Минскийн нисэх онгоцны буудалд саатуулагджээ. 2020 оны зун-намрын улиралд тус суваг Беларусь дахь эсэргүүцлийн жагсаалыг идэвхтэй мэдээлж, зохицуулж байв. Мөн сэтгүүлчид Лукашенкогийн гэмт хэргийг мөрдөн шалгах ажилд оролцож байжээ.
• - Тавдугаар сарын 8-нд  Афганистанд Кабул хотын сургуулийн ойролцоо бөмбөг дэлбэрсний улмаас 85 хүн амиа алдаж, 147 хүн шархадсан нь 2021 оны хамгийн  аймшигт дэлбэрэлт байв.

ЗУРГАДУГААР САР: Жое Байден анхны гадаад айлчлал

• -6-р сарын дундуур Жо Байдены анхны гадаад айлчлалаа Их Британид хийв.  Түүний энэхүү анхны гадаад айлчлалын зорилго нь АНУ-ыг дэлхийн манлайлал, Орос, Хятадтай өрсөлдөж буй барууны хамтын улс төрийн эв нэгдлийг сэргээх явдал байв.

ДОЛДУГААР САР:Жил хойшилсон зуны олимпыг үзэгчгүй  зохион байгуулав 

• -Долдугаар сарын дундуур Германы канцлер Ангела Меркель АНУ-д айлчлав. Хэлэлцээний дараа Меркель, Байден нар Атлантын далайг дамнасан харилцаа, эрчим хүч, уур амьсгалыг хамгаалах салбарын хамтын ажиллагаа, ОХУ, БНХАУ-тай харилцах, түүнчлэн коронавирусын тахлын эсрэг тэмцэх асуудлаар нэгдсэн байр суурьтай байгааг тэмдэглэв.
• -7-р сарын 23 - 8-р сарын 8-ны хооронд Токио хотноо  зуны олимпын XXXII тоглолт үзэгчгүйгээр зохион байгуулагдаж дэлхийн 206 улс орны тамирчид хурд хүчээ сорив.  2020 Зуны олимп COVID-19 тахлын улмаас хойшлогдож ийнхүү нэг жилийн дараа зохион байгуулж байгаа нь энэ юм.
• -Долдугаар сард Амазон компанийг үндэслэгч Жефф Безос болон түүний багийнхан сансарт анхны нислэгээ хийсэн бөгөөд энэ нь 10 минут 22 секунд үргэлжлэв. Багийнхнаас ямар ч хяналт  ажиллагаа шаарддаггүй 18 метрийн бүрэн автомат Нью Шепард пуужин дэлхийн гадаргуугаас 100 гаруй километрийн өндөрт гарчээ.

НАЙМДУГААР САР:Талибууд эргэн ирж, эх орондоо эзэн суув

• -8-р сарын сүүлээр АНУ Афганистанд 20 жилийн хугацаатай үүрэг гүйцэтгэсний дараа  тус улсын эрх мэдэл талибуудад шилжив. Талибууд 9-р сарын эхээр сүүлчийн мужийг эзлэн авснаар тус улсын бүх эрх мэдэл талибуудын гарт очиж байна.   Шинээр байгуулагдсан тус улсын шилжилтийн Засгийн газар Бүгд Найрамдах Афганистан Улс гэсэн нэрийг өөрчилж  Исламын Афганистаны эмират хэмээн нэрлэх болов.

 ЕСДҮГЭЭР САР:Хятадыг сөрөх цэргийн шинэ холбоо байгуулагдлаа

• -Есдүгээр сарын дундуур  Австрали, Их Британи, АНУ-ын хооронд AUKUS гурван талт цэргийн холбоо байгуулагдав.  Тус эвсэл нь дэвшилтэт технологиудыг давуу эрхтэйгээр солилцох, тэдгээрийн ашиглалтад хяналт тавих, Хятадыг, мөн ирээдүйд ОХУ-ыг эсэргүүцэх цэргийн чадавхыг хөгжүүлэх зорилгоор байгуулагдсан юм.
• -Мөн сард Герман улсад парламентын сонгууль болов. Энэ сонгуульд  Социал демократ нам ялсан нь содон үйл явдлын нэг байлаа.  Харин эрх баригч  эрх баригч консерватив ХАХ / ХХСС  эвсэл саналынхаа тоогоор хоёрдугаар байрт эрэмбэлэгдэв.

АРАВДУГААР САР: Японы Ерөнхий сайд Ёшихидэ Суга огцорлоо

• -Аравдугаар сард Японы Ерөнхий сайд Ёшихидэ Суга огцорлоо.Тэрбээр цар тахлын үеэр олимпын наадам зохион байгуулсны улмаас огцорч, харин түүний оронд  Фумио Кишида Японы шинэ ерөнхий сайд болов. Тэрбээр урьд нь Суга-гийн танхимд Гадаад хэргийн сайдаар ажиллаж байсан юм.

АРВАННЭГДҮГЭЭР САР: Цаг уурын асуудлаарх Глазго-гийн дээд хэмжээний уулзалт

• -11-р сарын эхээр Глазго хотод цаг уурын асуудлаарх дээд хэмжээний уулзалт (COP-26) болж, 200 гаруй орны төлөөлөгчид оролцсноос 120  гаруй орны төр засгийн тэргүүн нар биечлэн оролцжээ. Улс орнууд 2022 оны эцэс гэхэд цаг уурын зорилтуудыг төлөвлөснөөс 3 жилийн өмнө хэрэгжүүлэхээр тохиролцов.
• - Арваннэгдүгээр сард Польш, Беларусийн хил дээр цагаачлалын хямрал эхэлсэн. Беларусийн эрх баригчид тус улсаас ЕХ-ны орнууд руу цагаачдыг шилжүүлэх сувгийг зохион байгуулжээ. Европ энэ цагаачлалын хямралд Александр Лукашенког буруутгаж байна.
• -Арваннэгдүгээр сарын сүүлээр Барбадос арал Их Британийн титмээс гарав. Ингэснээр тус улс  Үндсэн хуульт хаант засаглалыг орхиж Бүгд Найрамдах Улс болж байна. Тус улсын анхны Ерөнхийлөгчөөр Сандра Мэйсон  томилогджээ.

АРВАНХОЁРДУГААР САР: Ангела Меркель 15  жилийн дараа улс төрөөс явав

• -Арванхоёрдугаар сард Ангела Меркель 15  жилийн дараа Германы Холбооны канцлерийн албан тушаалаасаа буув. Түүний оронд тус улсын парламентын сонгуульд ялсан Социал Демократ намын тэргүүн  Олаф Шольц томилогдов.
• - Арванхоёрдугаар сарын 10-11-нд  АНУ-ын түүхэн дэх хамгийн их сүйрэл дагуулсан хар салхи 100 гаруй хүний ​​аминд хүрсэн. Ялангуяа  Кентакки муж хамгийн их хохирол амссан. Хот  бараг бүхэлдээ балгас болж, дор хаяж 94 хүн нас баржээ.

Эх сурвалж:https://ru.slovoidilo.ua/ болон бусад