Грект халдвартай тэмцэх шинэ арга хэмжээнүүдийг танилцуулжээ

Грект коронавирусний хурдан халдварладаг “омикрон” хувилбарын тархалттай тэмцэхийн тулд шинэ арга хэмжээнүүдийг даваа гарагт танилцуулжээ.

Эрүүл мэндийн сайд Танос Плеврисийн мэдээлснээр, даваа гаргийн өглөө мэргэжилтнүүдийн хорооноос зөвлөмж гаргасны дараа шийдвэрлэсэн арга хэмжээнүүдийг ирэх нэгдүгээр сарын 3-наас 16-ны хооронд мөрдөнө.

Тодруулбал, нийтийн тээврийн хэрэгсэл, супермаркет болон олон хүн цугласан бүх газарт “FFP2” эвсэл “KN95” амны хаалт зүүх, боломжгүй тохиолдолд мэс заслын амны хаалтыг хоёр давхарлан зүүх шаардлагатай байна.

Мөн хоол хүнсээр үйлчилдэг, энтертайнмент үйлчилгээ үзүүлдэг газрууд шөнийн 12 цаг гэхэд үйл ажиллагаагаа зогсоох ёстой. Ингэхдээ зөвхөн ширээнд сууж үйлчлүүлэх хүмүүсийг хүлээн авах бөгөөд ширээнүүдийг зайтай байрлуулж, нэг ширээнд зургаагаас олон хүн суухыг хориглоно.

Спортын байгууламжуудын хувьд 10 хувийн дүүргэлттэйгээр үйл ажиллагаа явуулах боломжтой. Мөн ахмад настны асрамжийн газар, эмнэлэг, клиникүүдээр үйлчлүүлэх хүмүүст хатуу шаардлага тавих бөгөөд сүүлийн 48 цагийн дотор өгсөн шинжилгээний хариугаа үзүүлэх шаардлагатай байна.

Харин ажлын байрнуудын хувьд төрийн болон хувийн хэвшлийн байгууллагын ажилтнуудын 50 хүртэлх хувь нь гэрээсээ ажиллах боломжтой бөгөөд хүн ихтэй тээврийн хэрэгслээр үйлчлүүлэхээс зайлсхийхийн тулд ээлжийн хуваарийг гаргах ёстой ажээ.

Даваа гарагт Грект коронавирусний халдварын 9284 тохиолдол шинээр илэрсэн нь цар тахал дэгдсэнээс хойш улсын хэмжээнд өдөрт бүртгэгдсэн хамгийн өндөр үзүүлэлт болсныг тус улсын Үндэсний эрүүл мэндийн байгууллагаас мэдээлсэн байна.

Эрүүл мэндийн яамны мэргэжилтнүүдийн хорооны микробиологич Атанасиос Цакрисын мэдээлснээр, шинэ хувилбар нийслэл Афин хот оршдог Аттика бүсэд давамгайлан тархах болоод байна. “Өнгөрсөн долоо хоногт тус бүсээс цуглуулсан сорьцууд шинээр бүртгэгдэж буй тохиолдлуудын 70 хувь нь “омикрон” хувилбараар халдварласан байсныг харуулсан” гэж тэрбээр “Skai” радиод ярьжээ.

Грект өнөөдрийн байдлаар “COVID-19” халдварын 1 084 153 тохиолдол илэрч, 20496 хүн халдвараар нас баржээ. Мөн эрчимт эмчилгээний тасагт 629 өвчтөн эмчлүүлж байгаагийн 84.74 хувь нь вакцинд хамрагдаагүй юм уу эхний тунд хамрагдсан байгаа бол 15.26 хувь нь бүрэн тунд хамрагдсан хүмүүс байна. 

Эх сурвалж: Montsame.mn