Австрали улсад омикроны тархалт эрс нэмэгдэж, АНУ-д 1000 гаруй нислэг цуцалжээ

Австралид өнгөрсөн амралтын өдрүүдэд коронавирусийн омикрон хувилбарын халдварын тархалт эрс нэмэгдсэнийг мэдээллээ. Тус улсын Шинэ Өмнөд Уэльс мужид хоногт халдварын 6,324, Викториа мужид 2,000, Күйнслэнд мужид 784 болон Тасманид 35 тохиолдол илэрчээ.

Сидней Морнинг Хералд хэвлэл мэдээлснээр Шинэ Өмнөд Уэльс мужийн нутагт коронавирусийн халдвар авсан гурван хүн нас барсан байна. Эдгээр гурван хүний нэг нь омикрон хувилбараар халдварласан байжээ. Тус мужид омикроны халдвар авсан хүн нас барсан анхны тохиолдол ийнхүү албан ёсоор бүртгэгдлээ.

Австралийн Шинэ Өмнөд Уэльс, Тасмани, Күйнслэнд мужуудад 5-11 насны хүүхдүүдэд коронавирусийн эсрэг вакцин тарихыг зөвшөөрөөд байгаа юм.

Энэ хооронд зул сарын баярын өдрүүдэд АНУ-ын нутаг дэвсгэрт өчигдөр 1,000 гаруй нислэгийг цуцалжээ. Баярын өдрүүдэд гэр бүл, хайртай дотны хүмүүстэйгээ уулзахаар аялалд гарсан олон арван мянган зорчигч аяллын төлөвлөгөөгөө өөрчлөх шаардлагатай болж нисэх буудлуудад хоног төөрүүлэх болжээ.

Ковидын омикрон хувилбарын тархалт баярын өдрүүдэд эрс нэмэгдсэн тул гурав дахь хоногтоо дараалан АНУ даяар нислэгүүдийг цуцалж байна. Өнгөрсөн баасан гарагт буюу зул сарын баярын өмнөх өдөр 700 орчим, бямба гарагт буюу зул сарын баярын өдөр 997 нислэгийг цуцлаад байсан бол ням гарагт ийнхүү 1,000 гаруй нислэгийг зогсоожээ.

Коронавирусийн омикрон хувилбар одоогоор дэлхийн 100 орчим улсад бүртгэгдээд байгаа бөгөөд зул сарын баярын өдрүүдэд халдвар огцом нэмэгдэхийг эрүүл мэндийн салбарын мэргэжилтнүүд онцгойлон анхааруулаад байсан юм.

Европын Уэльс, Шотланд зэрэг улсад цар тахлаас урьдчилан сэргийлэх хорио цээрийн дэглэмийг шинээр тогтоож байгаа бол зарим нь ирэх жилийн хавар хүртэл цар тахлын үед авч хэрэгжүүлэх арга хэмжээг сунгаж байна. Франц улсад халдварын тархалт хамгийн өндөр түвшиндээ хүрч, хоногт 100,000 гаруй тохиолдол шинээр бүртгэгдлээ.