С.Амарсайхан: Ковидын шинжилгээний сорьц сольж, хуурамч хариу гаргасан нөхдүүдийн хэрэг шүүхэд шилжсэн

 УИХ-ын Аюулгүй байдал гадаад бодлогын байнгын хорооны хуралдааны үеэр УИХ-ын гишүүн Б.Бат-Эрдэнэ Цар тахлын хуулийг дагасан төрийн албаны томилгоотой холбоотой асуудал болон ажлын хариуцлага алдсан хүмүүстэй хариуцлага тооцсон эсэхийг Монгол Улсын Шадар сайд С.Амарсайханаас тодруулав.

УИХ-ын гишүүн Б.Бат-Эрдэнэ: Цар тахлын үед эмч, эмнэлгийн байгууллагынхан мөнгөөр ковидын шинжилгээний хариуг “Сөрөг” гэж гаргаж өгдөг асуудал яригдаад алга болсон. Салан баавгайн үлгэр шиг. Энийг мухарлах хэрэгтэй. Үнэн бол үнэн, худлаа байвал түүнийг нь хэлэх бололцоо байдаггүй юм уу. Цар тахлын хуулийг дагасан томилгооны асуудал бас яригдаж байна. Төрийн албыг төрлийн алба болгож байна уу? Ямар шалгуураар хүмүүсийг томилж байна хариулт өгөөч. Цар тахлын үеийн хандив, хөрөнгө мөнгөний зарцуулалт ил тод байх ёстой шүү. Амны хаалт, эм тарианы үнийг нэмсэн дундаас нь ашиг хонжоо хайсан өчнөөн олон асуудал байна. Энэ дээр хариулт өгөөч?

Шадар сайд С.Амарсайхан: Б.Бат-Эрдэнэ гишүүний асуултад хариулъя. Шинжилгээний сорьц сольсон. Хуурамч хариу гаргасан. Тусламжийн барааг худалдаж авсан мэтээр бүртгэсэн гээд 3-4 сард бөөн асуудал болж байсан. Түүнээс хойш Цагдаа, АТГ-т асуудлыг шилжүүлсэн. Эхнээсээ цөөнгүй нөхдүүдийн хэрэг шүүхэд шилжээд явж байгаа. Олон нийтэд нээлттэй мэдээлэгдэх байх гэж бодож байна. Хоёрдугаарт хүнд суртал төрийн албаны бүх шатанд байгаа. Хамгийн их хүндрэл учруулж байгаа асуудал бол энэ.   

Г.Жүгдэр