Омикроноор халдварласан хүмүүс эмнэлэгт хэвтэх нь дельтагаас 70 хувиар бага байна

Их Британийн Эрүүлийг хамгаалах газрын хийсэн судалгаагаар, омикрон хувилбараар өвчилсөн хүмүүсийн эмнэлэгт хэвтэж эмчлүүлэх шаардлага нь өмнөх хувилбаруудыг бодвол 70 хувиар бага байгааг тогтоожээ. Өөрөөр хэлбэл, хүндрэл бага байгаа нь тогтоогдсон байна. Гэхдээ халдварлах чадвар илүү тул маш олон хүн халдварлаж, тэр хэрээр эмнэлэгт хэвтэж эмчлүүлэгсдийн тоо нэмэгдэх магадлалтай гэсэн дүгнэлт гарсан байна. Судалгааны дүн ингэж гарсан ч “санаа амрахад” хэтэрхий эрт байгааг Эрүүл мэндийн сайд нь анхааруулав. Учир нь идэвхжүүлэгч тун буюу гуравдугаар тунг хийлгэснээс хойш 10 долоо хоногийн дараа л омикроныг саармагжуулах чадвартай дархлаа тогтож байж магадгүй гэнэ. Сайн мэдээ гэвэл хүндрэлээс хамгаалах чадвар харьцангуй өндөр байгаа нь тодорхой болжээ.    

Ингэснээр омикрон хувилбарын өвчлүүлэх чадвар улам бүр тодорхой болж байна. ӨАБНУ, Дани, Шотланд зэрэг улсад хийсэн судалгааны дүнгүүд бүгд АИх Британийхтай ижил гарлаа.

Их Британид омикрон хувилбараар халдварласан тохиолдол анх илэрснээс хойших 28 хоногт 14 хүн нас баржээ.    

Судалгааны дүнгээс харахад омикроноор өвчилсөн хүн дельтаг бодвол яаралтай тусламж авах магадлал 31-45 хувиар бага, эмнэлэгт хэтэж эмчлүүлэх хүртлээ хүндрэх магадлал 50-70 хувиар бага болох нь тогтоогдсон. Гэсэн ч маш хурдацтай тархаж, олон хүн өвдөж байгаа тул эрүүл мэндийн тогтолцоонд дарамт учруулах магадлал өндөр байна. Их Британид омикрон хувилбар орж ирснээс хойш өдөрт 119 000 хүртэл тохиолдол шинээр бүртгэгдэж байгаа нь урьд өмнөх давлагаануудын үеэр тохиолдож байгаагүй өндөр тоо юм.