У.Бямбасүрэн: Нийслэлийн ИТХ-ын ажлын албаны орон тоог 35-аас хэтрүүлэхгүй байхаар тогтоолоо

Засгийн газрын хуралдаанаас гаргасан шийдвэрийг танилцуулж байна.  Аймаг, нийслэл, сум, дүүргийн ИТХ-ын ажлын албаны бүтэц орон тоо, аймаг сумын Засаг даргын тамгын газрын бүтэц орон тооны хязгаарыг тогтоох тухай тогтоол Засгийн газрын хуралдаанаар гарсан талаар ЗГХЭГ-ын дэд дарга У.Бямбасүрэн мэдээлэл өгөв.

Тэрбээр "Ерөнхий сайдын Шинэ сэргэлтийн бодлогын нэгээхэн гол хэсэг нь төрийн байгууллагын бүтээмжийг сайжруулах, чиг үүргийн давхардлыг арилгах юм. Төрийн байгууллагын бүтцийг цомхон чадварлаг болгож иргэдэд үзүүлэх үйлчилгээний чанарыг сайжруулах алхам боллоо.

Нийслэлийн ИТХ-ын ажлын албаны орон тоог 35-аас хэтрүүлэхгүй, аймгийн ИТХ-ын ажлын албаны орон тооны хязгаар 8-12, сумынх 3-4 дүүргийн ИТХ-ын ажлын албаны орон тооны хязгаар дүүргийнхээ хүн амын тооноос хамаарч 8-21 байхаар тогтоосон. Аймгийн ЗДТГ-ын бүтэц орон тооны хязгаарыг тогтоохдоо орон нутгийн онцлог хүн ам, эдийн засгийн үйлдвэрлэлийн цар хүрээнээс хамаарч 34-46 байхаар тогтоож, шийдвэр гарлаа. Хэлтэс, тасаг, агентлагийн чиг үүргийг давхардуулахгүйгээр оновчтой шийдвэр гаргах үүргийг аймгийн Засаг дарга даалгасан. Аймгийн ЗДТГ-ын бүтэц орон тоог тогтоох ажил ирэх оноос хэрэгжиж эхлэх Засаг захиргаа нутаг дэвсгэр түүний удирдлагын тухай хуулийн бэлтгэл ажлын хүрээнд хийгдэж байгаа. Ингэснээр төрийн ажлын бүтээмж сайжирна гэж үзэж байна. Зарим орон тоо нэмэгдэж, зарим нь хасагдаж байгаа. Нийтдээ 162 орон тоо хасагдаж байна" гэв. 

Х.Соёл