Б.Мөнхжин: Эрээн хилээ хаагаагүй, үе шаттай ажил явагдаж байгаа

Гадаад харилцааны дэд сайд Б.Мөнхжин Замын-Үүд-Эрээний авто замын хилийн боомтыг дахин хаасан эсэх асуудлаар мэдээлэл хийлээ.

Тэрбээр "Арванхоёрдугаар сарын 08-ны өдөр би Замын-Үүд боомтод 20 хоногийн бэлтгэл хэр хангагдсан эсэхийг шалгахаар ажилласан. Бэлтгэлүүд хангагдсан байсан учраас Эрээний талтай ажлаа эхэлье гэдэг зөвшилцөлд хүрхээд маргааш нь буюу арванхоёрдугаар сарын 09-ны өдөр мэдээлэл хийхдээ 10-наас хил нээгдэнэ гэж хэлсэн. Арванхоёрдугаар сарын 10-наас тээврийн хэрэгслүүдийг Эрээн талаас дундын цэгт байршуулсан.

Манай тал тухайн цэг дээр байршсан 50 гаруй автомашиныг хил нэвтрүүлсэн. Энэ нь хил нээгдсэн гэдгийн нотолгоо юм. Эрээний талд цөөн хүндрэл гарсан. Эрээн талд очиж гацсан 192 машинаас асаж байгаагаас нь хилээр гаргаж байгаа үйл явц. Ачаатай тэрэгнүүдэд зарим хүндрэл гарсан. Энэ нь Эрээний гаалийн бүрдүүлэлт, бодит ачааны хэмжээ, жин зөрөх асуудал их байна.

Энэ хугацаанд Эрээний талаас үнэлгээ хийж байгаа. Тэг цэг дээр Монгол жолооч нар орсон учраас халдвартай бүс гэж үзэж байгаа. Халдварын тархалтыг яаж бууруулах талаар үнэлгээ хийгдэж, дүгнэлт гарч байна. Энэ өдрүүдэд Эрээн талын ажлууд хийгдэж байгаа гэж ойлгох хэрэгтэй. Энэ нь олон нийтийн ойлгож байгаа шиг Эрээний хилийг тодорхойгүй хугацаагаар хаасан гэсэн үг биш. Бараа бүтээгдэхүүнийг эргэлтэд оруулах үе шаттай ажил явагдаж байна." гэв.