Транспаренси интернэшнэлд Г.Ёндон, Х.Бадамсүрэн, Ковидын мөнгөний зарцуулалтыг хүргэжээ

    Төрийн өндөр албан тушаалтнууд, улсын томоохон үйлдвэрийн удирдлагууд хүүхдийнхээ сургалтын төлбөрийг улсын үйлдвэрийн данснаас төлүүлж байсан баримтууд гарсан билээ.  Тэгвэл эдгээр асуудлууд олон улсын байгууллагуудын анхааралд өртөн дэлхийд авлигын индекс зарладаг Германы Берлин хотод төвтэй Транспаренси интернэшнэл байгууллагад хүргэгджээ.

Монгол Улсад идэвхитэй үйл ажиллагаа явуулдаг уг байгууллага нь 2021 оны тайландаа эдгээр баримтуудыг дурдсан бөгөөд одоо хүртэл Уул уурхай хүнд үйлдвэрийн сайд Г.Ёндон ажлаа хийсээр байгааг мөн хадгаламжиндаа 400 сая төгрөгтэй хэрнээ хүүхдүүдийнхээ сургалтын төлбөр болох 10 сая төгрөгийг МонголРосЦветмет ТӨҮГ-аар гаргуулсан. Эрдэнэт үйлдвэрийн захирал Х.Бадамсүрэн нь мөн охиныхоо сургалтын төлбөр болох 102 сая төгрөгийг Торонтогийн их сургуульруу шилжүүлсэн нь Шилэн Цогоогийн баримтуудаар ил гарч Монголын олон нийтэд хүрч шуугиулж байсан юм.

Харин эдгээр этгээдүүд энэ хэргүүддээ ямар ч ял шийтгэл аваагүй бөгөөд харин ч эдүгээг хүртэл ажил албандаа байсаар байгаа нь олон улсын авлигын индекс тодорхойлогч байгууллагуудын анхаарлын төвд орсон байна.

Мөн Монгол Улсад хандивлагч улс орнууд, Европын холбоо, хөрш орнууд, олон улсын банк санхүүгийн байгууллагууд, иргэд, аж ахуйн нэгжүүдээс ирүүлсэн олон зуун сая долларын хандив тусламжийн зарцуулалт нь ил тод биш, одоог хүртэл Эрүүл мэндийн яам, Сангийн яам зэрэг хариуцсан байгууллагууд нь ямар ч тайлан гаргаагүй байгаа нь мөн олон улсын байгууллагын анхаарлын төвд оржээ.

Транспаренси интернэшнэл нь 2022 оны 1 сард 2021 оны авлигын индексийг зарлах юм байна. Эдүгээ Монгол Улс 111 дугаар байрт байгаа бөгөөд өмнөх жилүүдийнхээс 30 гаруй байраар ухраад байгаа бөгөөд 2022 оны зарлах хүлээгдэж буй дүнгээр энэ байр урагшлахгүй мөн ухрах магадлал өндөр байна.