Миеэ явж, МАХН-ын угшилтангууд өргөн фронтоор орж ирсэн МАН-ын шинэ удирдах зөвлөл

 Энэ долоо хоногийн эхний гурван өдөр эрх баригч намынхан зад хуралдлаа.  Намын даргаа жинхэлүүлж, Бага хурлаа шинэчилж, Удирдах зөвлөлөө сонголоо.  Дүрмэндээ ч шинэчлэлт оруулж,  хэд хэдэн гол асуудлаараа намын улс төрийн шийдэл гаргуулж амжив.

Өчигдөр шинээр байгуулагдсан Бага хурал хуралдаж, Намын ерөнхий нарийн бичгийн дарга  тэргүүтэн болон Удирдах зөлөлийн гишүүдийг сонгож баталлаа.

 Тодруулбал,  Бага хурлын анхдугаар хуралдаанаар Дашзэгвийн АмарбаясгалангмЕрөнхий нарийн бичгийн даргаар улираан сонголоо.  Ингэснээр тэр улс төрийн ууган хүчний гал тогоог дөрөв дэх удаагаа улиран  барих гэж байна. 

Энд тодотгоход МАН 30 дахь Их хурлаараа мөрийн хөтөлбөрөө шинэчлэн найруулж ЭРХ ЧӨЛӨӨ, ШУДАРГА ЁС, ЭВ САНААНЫ НЭГДЭЛ, үндэсний язгуур ашиг сонирхлыг дээдэлсэн Социал демократ үзэл баримтлалтай нам гэдгээ зарлаж “Шинэ зуун-Дэвшилтэт бодлого” хөтөлбөрөө 100 хувийн саналаар баталсан.

Өчигдөр бага хурлаараа мөн МАН-ын Удирдах зөвлөлийн гишүүдийн шинэчилсэн бүрэлдэхүүнийг баталлаа.  Урьд нь 30 хүний бүрэлдэхүүнтэй байсан Удирдах зөвлөлийг  нийт 36 гишүүнтэй байхаар нэмж баталсан юм.

МАН-ын  гүйцэтгэх төв байгууллага нь Удирдах Зөвлөл  бөгөөд Их хурлын  бүрэн эрхийн хугацаагаар сонгож, намын ЕНБД толгойлох бөгөөд ажлаа намын Бага хуралдаа тайлагнадаг. 

Мөн МАН-ын Удирдах Зөвлөлийн бүрэлдэхүүний 25 хувь намын анхан, дунд шатны төлөөлөл байх дүрмийн зохицуулалттай.

 Уншигч таныг МАН-ын шинээр сонгогдсон удирдах зөвлөлийн гишүүдтэй танилцуулъя.

 Д.Амарбаясгалан /МАН-ын Ерөнхий нарийн бичгийн дарга/

 Г.Занданшатар /УИХ-ын дарга/ 

3. Т.Аюурсайхан /УИХ-ын дэд дарга/ 

4. Я.Содбаатар /Ерөнхийлөгчийн тамгын газрын дарга/ 

5. Ц.Нямдорж /ЗГХЭГ-ын дарга/ 

6. Н.Энхболд /УИХ-ын гишүүн/ 

7. Ч.Хүрэлбаатар /УИХ-ын гишүүн/ 

8. Д.Сумъяабазар /Нийслэлийн Засаг дарга бөгөөд Улаанбаатар хотын захирагч/ 

9. Д.Сарангэрэл /УИХ-ын гишүүн/ 

10. Х.Булгантуяа /УИХ-ын гишүүн/ 

11. Н.Учрал /УИХ-ын гишүүн/ 

12. Б.Тогтохсүрэн /УИХ дахь МАН-ын бүлгийн дарга/ 

13. С.Бямбацогт /УИХ-ын гишүүн/ 

14. Ж.Мөнхбат /УИХ-ын гишүүн/ 

15. Ж.Ганбаатар /УИХ-ын гишүүн/ 

16. С.Амарсайхан /УИХ-ын гишүүн/ 

17. Ц.Даваасүрэн /УИХ-ын гишүүн/ 

18. Ц.Мөнх-Оргил /УИХ-ын гишүүн/ 

19. Б.Аубакер /УИХ-ын гишүүн/ 

20. Ж.Батжаргал /УИХ-ын гишүүн/ 

21. Б.Саранчимэг /УИХ-ын гишүүн/ 

22. Г.Амартүвшин /УИХ-ын гишүүн/ 

23. Ц.Мөнхцэцэг /УИХ-ын гишүүн/ 

24. Э.Батшугар /УИХ-ын гишүүн/ 

25. Б.Тулга /МАН-ын нарийн бичгийн дарга/ 

26. А.Ариунзаяа /Хөдөлмөр нийгмийн хамгааллын сайд/ 

27. Ч.Номин /Соёлын сайд/ 

28. П.Баттөр /ТВ9 телевизийн захирал/ 

29. О.Буяннэмэх /Ерөнхийлөгчийн зөвлөх/ 

30. Ц.Чулуунзагд /МАН-ын нарийн бичгийн дарга/ 

31. Н.Энхбаатар /МАН-ын Улс төрийн бодлогын хэлтсийн дарга/ 

32. Г.Золзаяа /МАХН-ын Гүйцэтгэх товчооны гишүүн асан/ 

33. Оюунбилэг /МАН-ын Бага хурлын гишүүн/ 

34. Н.Уламбаяр /МАХН-ын Гүйцэтгэх товчооны гишүүн, Тамгын газрын даргаар ажиллаж байсан/

 Удирдах зөвлөлд Н.Учрал, Х.Булгантуяа, Ч.Номин, Э.Батшугар, Б.Тулга нарын залуучууд  орж иржээ.  Ерөнхийлөгчийн сонгуулийн өмнөхөн МАН-тай намаа нэгтгэсэн Н.Энхбаяр  Удирдах Зөвлөлд МАХН-ын угшилтай  таван ч хүнээ барйшуулж Удирдах зөвлөлд  өргөн фронтоор орж ирлээ.  Удахүй Ц.Оюунбаатар, Ц.Шаравдорж гэхчлэн  гүйгүүлүүд албан тушаалд очих биз.

Ганцхан сарын өмнө  хүүгээ УИХ-ын гишүүнээр сонгуулж амжсан тэрбээр  энэ удаа бүр МАН-ын Удирдах зөвлөлийн гишүүн болгочихлоо. Эр хүний дотор эмээлтэй хазаартай морь гэдэг л энэ байх. Э.Батшугараас гадна  намын нарийн бичгийн дарга Б.Тулга, МАХН-ын Гүйцэтгэх товчооны гишүүн асан Г.Золзаяа,  МАХН-ын Гүйцэтгэх товчооны гишүүн, Тамгын газрын даргаар ажиллаж байсан Н.Уламбаяр, Н.Энхбаярын гэгддэг ТВ9 телевизийн захирал П.Баттөр  нар МАН-ын Удирдах зөвлөлд сонгогджээ.

Л.Оюун-Эрдэнийн  өнөөгийн танхмаас  ХНХ-ын сайд А.Ариунзаяа, Соёлын сайд Ч.Номин, ЗГХЭГ-ын дарга Ц.Нямдорж нар  Удирдах зөвлөлд сонгогдов. Ц.Нямдоржийн хувьд ч бол яахав, хуучин бууны хугархай. Харин сайдын албаасаа хэзээ мөдгүй чөлөөлөгдөнө гэж яригдаж байгаа Ч.Номин  эрх баригч намын  Удирдах зөвлөлд шууд орж ирсэн нь цаанаа таавар дагуулж байна. Түүнийг лоббидож сайд болгосон хүн нь экс Ерөнхийлөгч  Х.Баттулга. Засгийн газрын гишүүдийг давхар дээл өмсгөх бодлогод ширвэгдлээ ч цаашид Ч.Номин  МАН-ын чухал хүн хэвээр үлдэх зураглал эндээс харагдаж байна.  

Харин А.Ариунзаяагийн хувьд  албан тушаалын шатаар тун хурдтай өгсөж буй нэгэн.  Өвөөгийн нэр хүндээс гадна МАН-ын ЕНБД  Д.Амарбаясгалантай  ойр шадар нэгэн гэгддэг. Сайн яривал бүр нэг усных болно. Удирдах зөвлөлд шинээр орсон намын нарийн бичгийн дарга Ц.Чулуунзагд ч бас Засагтханы хөх харчуудын нэг.

Н.Энхболд, Ц.Даваасүрэн, Ч.Хүрэлбаатар нарын хууччуулаас гадна Г.Занданшатарын нэгэнтээ “Төрийн хатан эрдэнэ”-ээр өргөмжилж байсан Д.Сарангэрэл мөн л Удирдах зөвлөлд дахин сонгогдож байгаа төдийгүй намын нарийн бичгийн даргын үүргийг гүйцэтгэх бололтой юм. Гурван төрд нүүртэй хүн гэдэг шиг л...

Хэрэв Л.Оюун-Эрдэнэ танхмаа давхар дээлтэй сайд нараар бүрдүүлбэл сайдад нэр яригдах магадлалтай УИХ-ын гишүүн Г.Мөнхцэцэг, Б.Саранчимэг, Ж.Ганбаатар, Ж.Мөнхбат нар Удирдах зөвлөлийн гишүүнээр сонгогджээ.  

 Яах ч аргагүй МАН-ын ирээдүйн нүүр царайны илэрхийлэл гэж харагддаг УИХ-ын гишүүн Б.Энхбаяр, Ж.Сүхбаатар нарын шударга, залуу сайн хуульчид  Удирдах зөвлөлийн гадна үлджээ.

Г.Хантулга