Л.Халтар:Өнөөдөр БНХАУ-ын талаас дундын бүс дээр 2 чингэлэг оруулж ирсэн

Замын-Үүд, Эрээний хилийн боомтоор чингэлэг тээврээр ачаа бараа татан авах, гаргах ажлыг энэ долоо хоногт эхлүүлнэ гэж байсан. Тэгвэл өнөөдөр чингэлэг байршуулах талбай буюу хилийн 0 цэг дээр БНХАУ-ын талаас хоёр чингэлэг оруулсан байна. Ачаа тээвэрлэлтийн талаар Зам, тээврийн хөгжлийн сайд Л.Халтар мэдээлэл өглөө.

Тэрбээр "Үдээс өмнө БНХАУ-ын талаас дундын бүс дээрээ хоёр чингэлэг оруулж ирсэн байна. Эндээс Монголын талаас хэрхэн цаашаа таталт хийхийг харж байгаа байх. Ингэснээр ачаа тээвэрлэлтийн туршилт эхэлчихлээ гэсэн үг. Одоо айлын талаас цаашдаа хэзээнээс яг бүрэн байдлаар явуулах вэ гэдгийг харзнасан байдалтай байна. Гадаад яамны дэд сайд Замын-Үүд дээр очсон цаашаагаа Эрээнд байгаа консулын газрынхантай ярьж байгаа байх. Эрээний консулын газрын холбогдох улсууд Эрээний, Ардын засгийн ордныхонтой ярилцаад үдээс хойш нэг тодорхой чиглэл гарах байх гэж найдаж байна.

Хилийн боомтууд дээр халдвар хамгааллын дэглэмийг жоохон чангатгаж аль болох халдваргүй ногоон бүс болгооч ээ гэдэг асуудлыг Эрээний талаас удаа дараа тавьсан.  Харамсалтай нь бид нарын хувьд хилийн боомтууд ногоон бүс байж чадаагүй. Халдварын тархалт нэлээн өндөр болчихсон. Цаашдаа бид нар ч гэсэн одоо зүгээр сууж болохгүй. Аль болохоор хилийн боомтууд дээр энэ халдвар хамгааллын дэглэмийг сайн сахих ёстой. Үүнийгээ хатуу баримтлаад явбал айлын талаас бас юу юугүй одоо авахгүй, хаалгаа барилаа гэдэг ийм зүйл гараад байхгүй болов уу гэж найдаж байна. 

Дундын бүс нь 50 орчим чингэлгийн багтаамжтай. Энэ бол эхний шатных. Тэгээд цаашдаа хоёр талаасаа техник тоног төхөөрөмжийн хувьд нэмэх шаардлага байна уу тэрийгээ харна. Монголын талаас нэмэх шаардлагатай гэвэл бид нар энийг нэмэх ёстой.  Байдал тогтворжоод хавраас барилгын материал бусад ачааны эргэлт их болоод ирэх үеэр шаардлагатай гэвэл бид нар өдөрт 100, өөрөөр хэлбэл одоо нэг удаа эргэлт хийж байгаа бол цаашдаа хоёр тэгээд түүнээс дээш бололцоо юу байна гэдгийг одооноос ярьж байх ёстой юм байгаа юм.  Энэ долоо хоногт эхлүүлнэ гэснээрээ ямар ч байсан өнөөдөр эхлүүллээ. Цаашдаа жигдрүүлэхийн төлөө дипломат шугамаараа Гадаад яамны дэмжлэгтэйгээр Эрээний талтай ярилцана." гэсэн юм.