Дэлхийн улс орнуудад нэмэлт тунгийн дархлаажуулалт хэрхэн өрнөж байгаа вэ

Дэлхийн эрүүл мэндийн байгууллага дэлхийн нийт хүн амыг дархлаажуулахад дэмжлэг үзүүлэхийг хөгжингүй улс орнуудын удирдлагуудад уриалсаар буй. Дархлаа сэргээх нэмэлт III тунг улс орнууд ямар бодлогоор санал болгож байна вэ? 

Израиль

Израиль улс файзер вакцины нэмэлт III тунг долоодугаар сард зорилтот бүлэгтээ санал болгож эхлэснээр нэмэт тунг санал болгосон анхны улсуудын нэг болсон юм. Наймдугаар сард Израиль улс дельта хувилбарын давалгаанд өртөх үед 12 наснаас дээш насны иргэдийг дархлаажуулалтад хамруулах заалттай болжээ. Ингээд аравдугаар сар гэхэд Израилийн хүн амын бараг тал хувь нь дархлаа сэргээх нэмэлт тунд хамрагдсан байна.

Их Британи

Их Британийн Засгийн газар нэмэлт тунг эрүүл мэндийн салбарын ажилтнууд 50-аас дээш насны иргэдэд буюу эрсдэлтэй бүлэгтээ санал болгож буй. Одоогийн байдлаар зорилтот бүлэг буюу 30 сая иргэнээс есөн сая иргэн дархлаа сэргээх нэмэлт тундаа хамрагджээ.

Европын Холбооны гишүүн орнууд

Унгар улс наймдугаар сард нэмэлт III тунг санал болгосон Европын анхны улс болжээ. Харин Франц улсын Ерөнхийлөгч Эммануэл Макрон арванхоёрдугаар сарын дундаас нэмэлт тунд хамрагдсан өндөр настай иргэдэд дархлаажуулалтын гэрчилгээ олгож, олон нийтийн газарт нэвтрэх эрхийг баталгаажуулна гэдгээ мэдэгдсэн. Түүнчлэн есдүгээр сараас 65-аас дээш насны иргэдийг нэмэлт тунд хамруулж байсан бол дараа сараас 50 наснаас дээш иргэд нэмэлт тунд хамрагдаж эхлэх аж.

Арабын Нэгдсэн Эмират улс

АНЭУ нэмэлт тунг санал болгож эхэлсэн анхдагч улсын нэг. АНЭУ-ын Засгийн газар тавдугаар сард Синофарм вакцины нэмэлт тунг эрсдэлт бүлгийн буюу архаг хууч өвчтэй, өндөр настай иргэддээ санал болгож эхэлжээ. Тус улсын хүн амын 90 орчим хувь нь бүрэн тундаа хамрагдсанаар дархлаажуулалтын хувь хамгийн өндөр улсын нэг болсон юм. АНЭУ-ын иргэдийн дийлэнх хувь нь Хятад улсын Синофарм вакцин хийлгэсэн байна.

БНХАУ

Хятад улс 2022 онд Бээжингийн олимпоос өмнө иргэдээ нэмэлт тунд идэвхтэй хамруулах бодлого баримталж буй. Мөн эрх баригчдын мэдээлж байгаагаар зарим ажлын байранд шинэ ажилтан авахдаа нэмэлт тунд хамрагдсан байх шаардлага тавьж байгаа юм.

Япон

Япон улс арванхоёрдугаар сараас эхлэн эрүүл мэндийн салбарын ажилтнуудыг нэмэлт тунд хамруулж эхэлнэ. Мөн ирэх оны нэгдүгээр сараас өндөр настай иргэдийг гуравдугаар тунд хамруулна хэмээн Японы NHK телевиз мэдээлсэн. Тус улсын хүн амын 75 хувь нь вакцины бүрэн тундаа хамрагдаад байна.