Д.Сарангэрэл: Хоёр намын нэгдсэн нь Монгол Улсын эрх ашигт нийцсэн олон сорилтыг хамтран шийдэх чухал ач холбогдолтой үйл явдал байлаа

МАН-ын 30 дахь их хурал үргэлжилж байна. Монгол ардын намын 30 дугаар их хурал 278716 гишүүнийг төлөөлж 1245 төлөөлөгч оролцож байна. Хурлын эхэнд УИХ-ын гишүүн Д.Сарангэрэл мандатын комиссын илтгэлийг танилцуулав.

Илтгэлд "Монгол Улсад улс төрийн нам үүсгэн байгуулагдсны 100 жил, Ардын хувьсгалын 100 жилийн түүхэн ойн хүрээнд МАН, МАХН нэгдэн байгуулах үүрэг бүхий хамтарсан ажлын хэсэг байгуулагдан ажиллаж хоёр нам нэгдэх асуудал бодит үр дүнд хүрлээ. Хоёр намын нэгдсэн үйл явц нь Монгол Улсын том эрх ашигт нийцэн улс, эх орныхоо өмнө тулгамдсан олон том сорилтыг хамтран шийдэх чухал ач холбогдолтой нийгмийн хүлээлтэд бодитой хариу өгсөн түүхэн үйл явдал байлаа.

МАН-ын Бага хуралдаанаар намын дүрэмд өөрчлөлт оруулж, Бага хурлын гишүүдийг 369 гэснийг 479, Удирдах зөвлөлийн гишүүдийг 29 гэснийг 37, Хяналтын Ерөнхий хорооны бүрэлдэхүүнийг 15 гэснийг 19 болгож тус тус өөрчилсөн. МАХН-аас 34,789 гишүүдийг намын цахим системд бүртгэсэн бөгөөд одоогийн байдлаар МАН-ын цахим системд нийт 278,716 болж өслөө. 2020 оны жилийн эцэст намын гишүүдийн тоо 201,267 байсан. Намын гишүүдийн тоо өсөхөд олон хүчин зүйл нөлөөлсөн гэж үзэж байна.

Төлөөлөгчдийн 548 буюу 44 хувь нь Их хуралд анх удаа, 24.7 хувь буюу 245 нь хоёр дахь удаагаа 15.8 хувь буюу 197 нь гурав дахь удаагаа, 7.1 хувь буюу 89 нь дөрөв дэх удаагаа, 4.6 хувь буюу 58 нь 5 дахь удаагаа, 6 ба түүнээс дээш сонгогдсон төлөөлөгч 6.8  хувь буюу 41 байна. Намын их хуралд хамгийн их сонгогдсон буюу 12 дахь удаагаа сонгогдож байгаа 92 настай Монгол улсын Хөдөлмөрийн баатар, МАН-ын дарга асан Гомбожавын Очирбат байгаа бол 11 удаа сонгогдсон Төгсжаргалын Ганди, Наваансамдангийн Ганбямба, Дамдины Дэмбэрэл нар байна." гэв.

 30 дахь удаагийн Их хурлын хамгийн ахмад төлөөлөгч нь 92 настай бол хамгийн залуу нь 22 настай. Их хуралд урилгаар 200 хүн оролцож байгаа  бөгөөд нийт төлөөлөгчдийн 295 нь буюу 25 хувь нь эмэгтэйчүүд байна.