Крипто зах зээлийн нийт үнэлгээ 1 өдрийн дотор $2.6 их наядаас $2.07 их наяд руу унажээ

Биткойны ханш Бямба гарагт 17% унаж, $43K хүрсэн. Улмаар крипто зах зээлийн нийт үнэлгээ 1 өдрийн дотор 25%-иар буурч $2.6 их наядаас $2.07 их наяд руу унасан юм. Түүнчлэн крипто арилжаачдын айдас болон шуналыг харуулдаг “айдсын индекс” 18 болсон байна. 

Айдсын индекс 18 хүрнэ гэдэг нь

Уг индекс нь крипто зах зээлийн үнийн савлагаа, тренд, сошиал сувгуудын мэдээллийг ашиглан зах зээлийн сэтгэл зүйг тодорхойлон арилжаачдын айдас ба шуналыг харуулдаг. Өнгөрсөн сард индекс 73 буюу зах зээлийн худалдан авалт хэвийн түвшнээс их байж, хүмүүсийн худалдан авалт хийх шунал өндөр байсан юм. Харин одоо 18 хүртлээ буурч, хөрөнгө оруулагчид эрсдэлтэй хөрөнгө оруулалтын хэрэгслээс татгалзаж, худалдан авалт хийхээс айдастай байгааг илтгэж буй билээ. 

Уналтын шалтгаан

• Бондын худалдан авалт буурсан: Америкийн төв банк сар бүрийн бондын худалдан авалтаа $15 тэрбумаар бууруулж, мөнгөний бодлогоо чангатгах төлөвлөгөөтэй талаараа мэдэгдсэн нь крипто зах зээл рүү чиглэсэн мөнгөн урсгалыг бууруулж байна. Уг худалдан авалтыг цаашид ч бууруулах төлөвлөгөөтэй байгаа аж. Түүнчлэн $2.5 тэрбумын сан удирддаг хөрөнгө оруулагч Луйс Навелье Төв банкны уг шийдвэр ханшид нөлөөлөх болно гэж мэдэгдсээр ханш унаж эхэлжээ.
• Омикроны тархалт: 11 сарын 26-ны өдөр ковидын шинэ хувилбар бүртгэгдсэн. Уг мэдэгдэл гарсан даруй хөрөнгийн зах зээлд тодорхойгүй байдал үүсэж, эрсдэлтэй хөрөнгө оруулалтын хэрэгслээс татгалзах болсон аж. Мэдээний нөлөөгөөр биткойны ханш даруй 9% унасан билээ. Америкт эхний тохиолдол бүртгэгдэн бусад улсаас тээвэр хүлээн авах журмаа ч чангалаад байна.

Ийнхүү нэлээн өөдрөг байсан криптогийн зах зээл айдаст өртөж эхэлсэн нь энэ. Биткойны ханш буцаад $50K руу дөхсөн ч дахиад нэг л муу мэдээ гарахад савлагаа үргэлжлэхээр эмзэг байдалтай байна даа.

                                                                                                               Эх сурвалж: Lemonpress