Говьсүмбэрийн удирдлагууд 300 сая төгрөгөөр машин авахаар хүч түрэн улайрч байна

Засгийн газраас эдийн засаг хямарсан энэ цаг үед хэмнэлтийн бодлого баримтална гэж ярьж буй ч бодит байдал дээр дүр зураг эсрэгээрээ байна. Тодруулбал Говьсүмбэр аймгийн удирдлагууд 2022 оны төсөвтөө 300 сая төгрөгөөр автомашин худалдаж авахаар тусгаж, төсвөө батлахаар хүч түрэн улайрч буй аж.

Өнөөдөр Говьсүмбэр аймгийн ИТХ 2022 оны төсвөө хэлэлцэж батлахаар хуралдаж буй бөгөөд хурлын үеэр төсвийн мөнгөөр ЗДТГ-т буюу нэг даргад зориулж өндөр үнэтэй машин авах гэж байгааг АН-ын гишүүд эсэргүүцжээ. Гэвч МАН-аас аймгийн ИТХ-д сонгогдсон гишүүд олонхоороо хүч түрэн батлахаар улайрч буй талаар эх сурвалжууд мэдээлж байгаа юм.

Говьсүмбэр аймгийн тухайд газар нутаг харьцангуй жижиг буюу гурав сумтай. Тиймээс 300 сая төгрөгөөр жийп автомашин авах хэрэгцээ шаардлагагүй гэж нутгийн иргэд үзэж буй аж. Үүнээс гадна өвөлжилтийн бэлтгэл ажлаас эхлээд хөрөнгө мөнгө шаардлагатай олон ажлууд шилээ даран хүлээж байхад тус аймгийн удирдлагууд автомашин авахыг илүүд үзсэн байгаа юм.

Засгийн газрын хэмнэлтийн горимоор ажиллах үүрэг зөвхөн цаасан дээр л бууж үлддэгийн тод жишээ бол энэ юм. Төсвийн мөнгийг үр ашиггүй зүйлд зарцуулж, дарга нарын ая тух тансаглалд татвар төлөгчдийн мөнгийг зориулахаар улайрч буй энэ мэт жишээ ганц Говьсүмбэр аймгаар тогтохгүй их ээ.  

 Г.Учрал