Иргэд БНСУ-ын элчин сайдын яаманд уучлалт гуйхыг шаардсан албан бичгийг хүргүүлэв

БНСУ-ын элчин сайдын яамны гадна иргэд тайван жагсаал хийж байна. Учир нь БНСУ-ын дунд сургуулийн сурагчид сургуулийнхаа Монгол охиныг зодож, хүчээр архи уулган, 6 цаг өрөөнд нь хорьсон ноцтой хэрэг гарсан. Уг асуудалтай холбоотойгоор иргэн Ж.Отгонбаяр тэргүүтэй иргэд гурван шаардлагыг тавьж албан бичгийг БНСУ-ын элчин сайдын яаманд хүргүүлж байгаа юм.

Иргэн Ж.Отгонбаяр: Өмгөөллийн болон сэтгэл зүйн үйлчилгээ үзүүлэхийг шаардаж байна

 “БНСУ-ын элчин сайдын яамны зүгээс Монголын ард түмэн болоод хохирогч охин, түүний гэр бүлээс албан ёсоор уучлалт гуйсан бичлэгийг өөрсдийн пэйж хуудастаа байршуулах. Хохирогч охинд эрх зүйн дэмжлэг болоод нөхөн төлбөр өгөхийг шаардаж байна. Өмгөөллийн болон сэтгэл зүйн үйлчилгээ үзүүлэхийг шаардаж байна. Монгол улсын 40 мянган залуучууд танай улсын хөгжилд хувь нэмэр оруулж ажиллаж амьдарч байгаа гэж бодож байгаа. Энд монгол хүний үнэлэмжийн асуудал ч гарч ирж байна. Цаашид ийм явдал гарахгүй байх, монгол хүний эрх чөлөөнд халдахгүй байх гэж энэхүү албан бичгийг хүргүүлж байна” гэв.

БНСУ-ын элчин сайдын яамны зөвлөх Ким Чол Су: БНСУ-ын Засгийн газраас энэ асуудлыг нэн даруй, шударгаар шийдэгдэхэд анхаарч ажиллана

"Сайн байна уу? БНСУ-ын элчин сайдын яамны зөвлөх Ким Чол Су гэж хүн байна аа. Манай БНСУ болон Монгол улсын хооронд дипломат харилцаа тогтоогоод 30 гаруй жил болсон. Энэ хугауцаанд найрсаг хамтын ажиллагааг хөгжүүлж ирсэн. Энэ үед ийм харамсалтай хэрэг гарсанд БНСУ-ын  элчин сайдын яамны дипломат ажилтны хувьд маш их харамсаж байгаагаа илэрхийлье.

БНСУ-ын элчин сайдын яамны дипломат ажилтны хувиар энэ болсон хэргийг нэн даруй шударгаар шийдвэрлэх талаар Солонгосын холбогдох байгууллагуудтай үргэлжлүүлэн зөвшилцөж байгаа. БНСУ-ын Засгийн газраас энэ хэргийг нэн даруй шударгаар шийдүүлэхэд анхаарч ажиллана. Шийдвэр гарсан даруйд нь МУ-ын Засгийн газарт албан ёсоор мэдэгдэнэ.

Энэ асуудлаар бид өчигдөр ГХЯ-ны төрийн нарийн бичгийн дарга Н.Анхбаяртай уулзаж хөндөж ярилцсан байгаа. Солонгосын улсын Засгийн газар энэ асуудалд мэдээлэлтэй байгаа. Сая хэлсэнчлэн 40 гаруй мянган хүн ажиллаж амьдарч байна. Энэ бага тоо биш. Эдгээр хүмүүс ажиллаж амьдарч байгаа нь хоёр орны найрсаг харилцааг улам гүнзгийрүүлэн ажилладаг гэж боддог. Цаашид энэхүү суурьт тулгуурлаад хоёр орны найрсаг харилцаа үргэлжилнэ гэдэгт итгэж байна.” гэсэн юм.