Монгол улсын махны экспорт Шинэ Зеландаас бага байна

 

Монгол улс юугаар баян бэ гэвэл мэдээж малаар баян хэмээн дуу нэгтэй дуугарах байх.

Харин өөрсдөдөө байгаа тэрхүү баялгаа хэр сайн үнэ цэнд хүргэж чаддаг вэ гэдэг хамгийн чухал асуулт болоод байна.

Шинэ Зеланд VS Монгол

Шинэ Зеланд улс манай улсыг бодвол газар нутгийн хувьд ч, малын тоо толгойгоор ч цөөн улс. Гэтэл тэд өнгөрөгч 2020 онд $9.2 тэрбумын 400 мянган тн хонины мах, 471.7 мянган тн үхрийн махыг 111 оронд экспортолжээ.

Харин манай улсын хувьд 2020 онд нийт экспорт $7.7 тэрбумд хүрсэн ба үүний 80% нь нүүрс, зэс, алт, төмрийн хүдэр зэрэг уул уурхайн түүхий эд байв. Үүнээс ердөө $92.6 сая нь 38.8 мянган тн орчим мах экспортолсон дүн юм. Үнэлгээний хувьд Шинэ Зеланд 1 кг мах дунджаар $10.5, Монголынх $2.4 ажээ.

Салбарын хөгжил

Шинэ Зеланд улсын хоёрдогч том экспортын гол бүтээгдэхүүн нь мах бөгөөд улсын хэмжээнд 60 гаруй байршилд 25,000 хүнийг ажлын байраар хангадаг хамгийн том үйлдвэрлэлийн салбар юм

Тэдний махны үйлдвэр жил бүр 25 сая хонь, 5 сая үхэр боловсруулдаг. Мах экспортоор авдаг гол түнш нь Хойд Америк бөгөөд тэд үхрийн махны 48%, Хойд Ази 23% -ийг нь экспортоор авдаг байна. Ерөнхийдөө энэ салбартаа гаршсан л гэсэн үг.

Харин манайд

Манай улсын хувьд 2019 оны судалгаагаар улсын хэмжээнд мал төхөөрөх 52 үйлдвэр, мах боловсруулах 110 үйлдвэр байгаагаас 103 үйлдвэр идэвхтэй үйл ажиллагаа явуулж байгаа юм.

Гэвч салбарын хэмжээнд мал төхөөрөх үйлдвэрүүдэд суурилагдсан хүчин чадлын 10-20 хувийг ашиглаж байна. Цаашлаад салбарын хөгжил ийм муу байгаа нь мал маллах, эрүүл байлгах, тэжээх, бэлтгэн нийлүүлэх, үйлдвэрлэх, борлуулах, тээвэрлэх явц тус бүрийн өгөөж муу байгаатай холбоотой аж.

 

 

 

 

 

                                                                                                                                Эх сурвалж: Lemonpress