Д.Сумъяабазар: Хариуцлага хүлээдэггүй ААН-үүдээс болж төрийн ажил гацаж байна

Сард нэг удаа Нээлттэй Улаанбаатар хэвлэлийн хурлыг хийдэг.

Өнөөдрийн хурлаар ААН-үүдэд дарамт болдог дүрмүүд болон Газрын албаны үйлчилгээ цахимд шилжсэн талаар мэдээлж байна.

Нийслэлийн засаг дарга Д.Сумъяабазар "Нийтийн эдэлбэр газарт ногоон байгууламж бүрдүүлэх үүрэг хүлээсэн. Нийтийн эдэлбэрийн сөөм газрыг ч алдахгүй. Хороод иргэддээ төрийн үйлчилгээг түргэн шуурхай хүргэх хэрэгтэй. Нийслэлд жилд 35 мянган иргэн шинээр ирж суурьшиж байна. Хүн амын нягтаршил нэмэгдэж байгаа тул зарим хороог 15 мянган иргэнд нь барихын тулд хуваах нь зөв гэдэг дээр судалгаа хийж оруулж ирсэн.

Энэ ондоо багтаж 90 автобус авах байсан ч хариуцлага хүлээдэггүй аж ахуй нэгжүүдээс болж төрийн ажил гацаж байна. Тендерийн хууль ойлгомжгүйгээс болж нийслэлийн ажил дандаа хугацаа алддаг.

537 автобусын ашиглалтын хугацаа дууссан. Автобусыг өнөөдөр ч сольж нэммээр байна. Гэвч хууль, аж ахуй нэгжүүдийн маргаанаас болж урагшаа алхахгүй байна" гэв.

Нийслэлд 2022 оноос томоохон бүтээн байгуулалт эхэлнэ. Нийт 90 байршилд холбоос, гол, туслах зам хийгдэнэ. 1800 метр гүүр болон шинээр байгуулах тулгуур байгууламж бүхий галт тэрэгний зураг төслийн ажлууд хийгдэж байна гэж албаныхан мэдээлсэн.

2020 оны авлигын индексийн дүнгээр Монгол улс 35 оноо авч 180 улсаас 111-р байрт эрэмбэлэгдсэн.

Бизнес эрхлэхүй 2020 тайлангаар манай улс 190 орноос 81-р байрт жагсаж байна.

Нийслэлийн нутгийн захиргааны 42 байгууллагаас 600 нэр төрлийн үйлчилгээг иргэн хуулийн этгээдэд үзүүлж байна. Үүнээс:

• Тусгай зөвшөөрөл олгох: 45
• Энгийн зөвшөөрөл олгох 30
• Зөвшөөрлийн шинжтэй буюу эрх олгосон 97, нийт 172 үйлчилгээ байна.

Дээрх зөвшөөрлүүдээс шаардлагагүй, хуульд зааснаас бусдыг хөнгөвчлөх, хүчингүй болгох ажлыг зохион байгуулах ажлын хэсэг байгуулах бөгөөд үүнд ААН-үүдийн оролцоо чухал гэв.

Ажлын хэсэг 12 сарын 20-нд хотын даргад саналаа танилцуулна.

13 орчим тэрбум төгрөгөөр 17 хороо шинээр байгуулж байна. Эхний ээлжид эмнэлэг, цагдаа, хэсгийн ахлагч нар түрээсийн байранд байрлана. Нийслэлд 15-30 мянган хүн амтай 50 гаруй хороо бий.

Алслагдсан, хүн ам ихтэй хороонд төрийн үйлчилгээ авч чадахгүй иргэд олон байна. Хорооны иргэдийн тоо 15 мянгаас дээш гарвал төрийн үйлчилгээ хүн бүрт хүрч чадахгүй болдог гэж Нийслэлийн засаг дараг Д.Сумъяабазар хэллээ.