В.Путин: Хүний удамшлын мэдээллийг ашиглахыг зохицуулах хууль тогтоомж хэрэгтэй

ОХУ-ын Ерөнхийлөгч генетикийн технологийн салбарт хүлээн зөвшөөрөгдөхүйц ёс зүйн хэм хэмжээг тодорхой тогтоох шаардлагатай гэж үзэж байна.

"Хамгийн чухал сэдэв бол генетикийн мэдээлэл. Юуны өмнө бидэнд иргэдийн эрхийг хангах, иргэн болон түүний гэр бүл, тэр дундаа хойч үеийнхний генетикийн мэдээллийг олж авах, ашиглах, хамгаалах асуудлыг зохицуулах хууль тогтоох  хэрэгтэй" гэж Путин хэлжээ. 

Тэрээр мөн энэ чиглэлийн бүх шийдвэрийг "шинжлэх ухаан, мэргэжлийн хүмүүстэй нягт харилцан ярилцаж, болгоомжтой гаргах ёстой гэж  онцолсон байна.  Энэ нь дээж материалыг хадгалах нэгдсэн  системийг бүрдүүлэхэд ч хамаатай. Био аюулгүй байдлын тухай хуулийг хэрэгжүүлэх ажлын хүрээнд ийм ажил хэдийнэ эхэлснийг төрийн тэргүүн дурджээ. 

Ерөнхийлөгч мөн ОХУ-д бий болсон үндэсний генетик мэдээллийн сангийн үйл ажиллагааны журмыг нарийвчлан тогтоохыг уриалав. "Вавиловын нэрэмжит Бүх Оросын ургамлын хүрээлэнгийн үндсэн дээр байгуулагдсан үндэсний био нөөцийн төв, генетикийн мэдээллийн баазын үйл ажиллагааны журмыг нарийвчлан тодорхойлох шаардлагатай гэж би үзэж байна" гэжээ.

2020 онд Ерөнхийлөгч Курчатовын хүрээлэнгийн оролцоотойгоор 2021 оноос үндэсний генетик мэдээллийн баазыг бий болгох, ажиллуулахад шаардагдах санхүүжилтийг жил бүр гаргахыг Засгийн газарт даалгасан юм.

Генетикийн салбарын хууль тогтоомж нь анагаах ухаан, мал эмнэлэг, үржлийн болон бусад салбарт шинжлэх ухааны судалгаа хийх, инновацийг бий болгох боломжийг нээнэ. Ерөнхийлөгчийн хэлснээр, энэ салбарын ёс зүйн хэм хэмжээ нь "ойлгомжтой, судлаачид болон бизнесийнхэн, хамгийн гол нь  нийгэмд хүлээн зөвшөөрөгдөж  хүмүүсийн итгэлийг хүлээх ёстой"  байх аж.

Мөн ойрын хугацаанд Ерөнхийлөгч  улс орны хүнсний аюулгүй байдалд стратегийн ач холбогдолтой ургамлын генийн дээжийг эргэлтэд оруулах журмын тухай зарлигт гарын үсэг зурахаар төлөвлөж байгаа ажээ. "Юуны өмнө стратегийн үр тариа нь манай хүнсний аюулгүй байдлын түлхүүр юм. Бид мэдээж улаан буудай болон бусад үр тарианы тухай ярьж байна" гэж ерөнхийлөгч тодотгожээ

Оросын төрийн тэргүүн генийн технологийн хөгжилд дотоодын компаниудыг татан оролцуулах шинэ хөшүүрэг нэвтрүүлэхийг үгүйсгэсэнгүй. "Шинжлэх ухааны ололт амжилтыг хүний ​​амьдралын чанар болгон хувиргахын тулд генетикийн технологийн хөтөлбөрт манай компани, бизнесийн оролцоог өргөжүүлэх шаардлагатай" гэжээ.

Эх сурвалж: Итар ТАСС