Б.Жавхлан: Гашуунсухайт боомтын нүүрс тээвэрлэлт хэвийн болж эхэлж байна

Засгийн газрын ээлжит хуралдаанаар хэлэлцэж шийдвэрлэсэн асуудлын талаар мэдээлэл өгч байна.

Сангийн сайд Б.Жавхлан  Өнгөрсөн гурав хоногт холбогдох сайдууд болон Өмнөговь аймгаас сонгогдсон УИХ-ын гишүүдийн хамт Гашуунсухайт, Шивээхүрэн боомтод ажиллаад ирлээ.

Гашуунсухайт боомт 2021 оны аравдугаар сард Сангийн сайд болон Шадар сайдын хамтарсан тушаалын журмаар Гашуунсухайт-Ганцмод боомтын хооронд нүүрс зөөвөрлөн гаргах ажлыг нарийн журамлаж өгсөн. Энэ ажлын хүрээнд нүүрс тээврийн асуудал харьцангуй сайн журамлагдаж, эмх цэгцэндээ орох нааштай үр дүн гарсан байна.

Үүний үр дүнд сүүлийн гурваас дөрөв хоногт 400-500 тээврийн хэрэгслээр нүүрс гарч эхэлсэн. Өнөөдөр 600 тээврийн хэрэгслээр нүүрс гарсан байна. Энэ нь цаашдаа улам тогтворжиж сайн үр дүн өгснөөр энэхүү тоог шат дараатайгаар нэмэгдүүлэх боломж үүснэ. 

Шивээхүрэн боомтод нүүрс экспортлогч аж ахуйн нэгжүүд тэнд чингэлэг тээврийг эхлүүлэхээр бүтээн байгуулалтын ажлуудаа эхэлсэн. Одоогоор ажлын явц 80 хувьтай байна 

Замын-Үүдэд боомтын тухайд төмөр замын тээвэр хэвийн байна. Харин газраар тээвэрлэх  асуудлаар Хятадын талаас манай талд тавьсан санал аль болох хавьтал болгохгүйгээр “0 цэг”-ээс барааг татаж авдаг  байя гэж байгаа.  Өөрөөр хэлбэл хоёр хилийн дундах “0 цэг”-т тавцан үүсгэж, тэндээс чингэлэг тээврээр татаж авах.

Эрээн хотод сүүлийн долоо хоногт халдвар илрээгүй.  Цаашид 14-20 хоног ажиглана, халдвар илрэхгүй бол дээрх хэлбэрээр тээвэрлэлтийг эхлүүлнэ гэж байна.  Аль ч талдаа нөхцөл байдалд яаж ч өөрчлөгдсөн энэ горимоороо явна гэсэн ойлголцолд хүрсэн. Өдөрт 50 чингэлэг ачаа татах хэлбэрээр эхэлье гэж байгаа. Нэг чингэлэг нь 20 тонн байна” гэлээ.