Монгол койнуудын харьцуулалт

Сүүлийн хэдэн сар Монголд маань криптовалютын зах зээл маш эрчимтэй хөгжиж, шинэ койнууд ар араасаа IEO хийх болсон. Тиймээс IEO-оо хийгээд буй Монгол койнуудын мэдээллийг нэгтгэн хүргэж байна. Доор мэдээлэл нь орсон зарим койнуудын хувьд хоёрдогч зах зээлийн арилжаа хараахан эхлээгүй байгаа билээ.

*Койнуудын ханшийг 11 сарын 16 өдрийн 14:50 минутын ханшаар оруулсан болно. Тиймээс зах зээлийн ханшийг мөн адил цагийн ханшаар тооцож гаргасан юм. Мөн зах зээлийн үнэлгээг зах зээл дээр эргэлдэж буй койны ширхэг бус нийт гаргасан койны хэмжээгээр бодсон гэдгийг анхаарна уу.

АрдКойн (ARDX)

Гаргасан компани: Ард Бит ХХК

Нийт койны хэмжээ: 5,158,308,000 (5.2 тэрбум ширхэг)

Олон нийтэд санал болгосон хувь: Олон нийтээс хөрөнгө татаагүй

IEO-оор татан төвлөрүүлсэн хөрөнгийн хэмжээ: Олон нийтээс хөрөнгө татаагүй

IEO/анхны ханш: ₮1

Одоогийн ханш: ₮144

Зах зээлийн үнэлгээ: ₮743 тэрбум

Арилжаалагддаг биржүүд: Dax.mn, Trade.mn, Coinhub.mn, Complex.mn

Онцлог: Ард Санхүүгийн Нэгдлийн бүтээгдэхүүн үйлчилгээг авсан хэрэглэгчдэд урамшуулал олгох зорилгоор гарч ирсэн ба блокчэйн технологи дээр суурилсан урамшууллын оноо гэдгээрээ бусад урамшууллын онооноос ялгаатай ажээ.

Ихкойн (IHC)

Гаргасан компани: Их Бит ХХК

Нийт койны хэмжээ: 1,000,000,000,000 (1 их наяд ширхэг)

Олон нийтэд санал болгосон хувь: 100,000,000,000 (10% буюу 100 тэрбум ширхэг)

IEO хийсэн өдөр: 2021.08.25

IEO-оор татан төвлөрүүлсэн хөрөнгийн хэмжээ: ₮30 тэрбум

IEO ханш: ₮0.3

Одоогийн ханш: ₮5

Зах зээлийн үнэлгээ: ₮5 их наяд

Арилжаалагддаг биржүүд: Dax.mn, Trade.mn, Coinhub.mn, Complex.mn

Онцлог: Жил болгон Америкийн инфляцын түвшинтэй адил хувиар IHC койныг шатаах буюу устгалд оруулна хэмээн амлаад буй. Ийнхүү IHC койн нь инфляцын эсрэг хамгаалалтыг бий болгож мөнгөний үнэ цэнийг хадгалах зорилготой ажээ.

Digital Exchange Coin (TRD)

Гаргасан компани: Дижитал Эксчейнж Монголиа ХХК

Нийт койны хэмжээ: 20,000,000,000 (20 тэрбум ширхэг)

Олон нийтэд санал болгосон хувь: Олон нийтээс хөрөнгө татаагүй

IEO-оор татан төвлөрүүлсэн хөрөнгийн хэмжээ: Олон нийтээс хөрөнгө татаагүй

IEO/анхны ханш: ₮1

Одоогийн ханш: ₮3.2

Зах зээлийн үнэлгээ: ₮63 тэрбум

Арилжаалагддаг биржүүд: Trade.mn

Онцлог: Trade.mn биржийн шинэ хэрэглэгчдэд зориулсан урамшуулал, арилжааны шимтгэлийн урамшуулал, шинэ токены бүртгэлд урамшууллаар олгох замаар нийт койны 39%-ийг хувиарлах юм. Үлдсэн 61%-ийг биржийн одоогийн хувьцаа эзэмшигч нарт хувиарлах ба хувиарлалт хийгдсэнээс хойш 18 сарын турш арилжаалах боломжгүй байна. Улирал бүр цэвэр ашгийг койн эзэмшигч нарт хувиарлана. 1 тэрбум TRD эзэмшигч компанийн ТУЗ-д сонгогдох эрхтэй аж.

И.Шинэбат