Жефф Безосын  хөлгөөр сансарт аялсан  бизнесмэн онгоцны ослоор нас баржээ

Аравдугаар сард тэрбумтан Жефф Безосын Blue Origin-ийн New Shepard хөлгөөр  сансарт ниссэн бизнесмен Глен де Врис онгоцны ослоор осолдсон  тухай CBS телевизийн суваг мэдээлэв.

Энэхүү онгоцны осол  АНУ-ын Нью Жерси мужийн Сассекс мужид болжээ. "Dassault Systèmes" компанийн дэд ерөнхийлөгч 49 настай де Врис сонирхогч нисгэгч байжээ. Онгоцны хоёр дахь зорчигч 54 настай Томас Фишер мөн амь үрэгдсэн байна.  АНУ-ын Холбооны Нисэхийн Захиргаа энэ үйл явдлыг шалгаж байна.

"Бид Глен де Врисийн гэнэтийн үхлийн тухай мэдээнд маш их гашуудаж байна. Тэр  сансрын багийнхандаа  маш их эрч хүчийг авчирсан. Түүний нисэхийн хүсэл тэмүүлэл, буяны үйлс, зорилгодоо үнэнч зүтгэл нь цаашид удаан хугацаанд хүндлэл, бахдал хүлээсээр байх болно" гэж Blue Origin твиттер хуудсандаа бичсэн байна.

"Dassault Systèmes" компанийн төлөөлөгч талийгаачийн ар гэрийнхэнд эмгэнэл илэрхийлжээ. Түүний уйгагүй эрч хүч, энэрэнгүй сэтгэл, шинийг эрэлхийлэгч сэтгэл нь өөрийг нь таньдаг хүн бүрт мартагдашгүй  ул мөр үлдээсэн гэдгийг онцолжээ.

Жефф Безос корпорацын зорчигчидтой хоёр дахь  сансрын нислэг 10-р сарын 13-нд болсон бөгөөд 11 минут орчим үргэлжилсэн юм.

Глен де Врисийн хамт  "Оддын аялал" телевизийн олон ангит киноны ахмад Киркийн дүрээр алдаршсан 90 настай Канадын жүжигчин Уильям Шатнер, Blue Origin компанийн дэд ерөнхийлөгч Одри Пауэрс, НАСА-гийн инженер асан Крис Босчуйсен нар сансарт аялсан юм.