Хятад улс коронавирусын эсрэг “ард түмний дайн” зарлав

-Хятадын Хайхэ хотод COVID-19-ийн талаарх мэдээлэлд 100 мянган юань төлнө-

Хятадын зүүн хойд хэсэгт коронавирусын эсрэг "ард түмний дайн" эхлүүлж, вирусын эх үүсвэрийг мэдээлсэн хүнийг шагнаж урамшуулах тухай  зарлаж байна гэж Global Times бичжээ.

Энэхүү "ардын дайн" нь  Оростой хиллэдэг Хэйлунжан мужид байрладаг  Хайхэ хотын тухайд илүү хамааралтай болж байна. Тус хот нь ОХУ-ын  Благовещенск суурингаас голын эргээр тусгаарлагддаг юм.  Хайхэ хотын эрх баригчид  коронавирусын халдварын  эх үүсвэрийн талаархи мэдээллийг 100 мянган /44,5 сая орчим төгрөг/ юаниар урамшуулах аж. Энэ мөнгөн шагналыг тус хотод вирус хаанаас юунаас болж дахин дэгдсэн талаархи бодитой мэдээлэл өгсөн хүмүүст зарцуулах юм. 

"Ингэснээр олон нийт вирусыг хянах ажилд идэвхтэй оролцож, мэдээлэл өгөх боломжтой болно гэж найдаж байна" гэж тус хотын засаг захиргаа итгэлтэй байгаагаа илэрхийлжээ.

Эрх баригчдын тэмдэглэснээр, COVID-19-ийн эх үүсвэрийг тодорхойлох нь одоогоор "хамгийн тэргүүний зорилт" болоод байна. Хотын эрх баригчид  мөн коронавирусын талаарх мэдээллийг санаатайгаар нуусан хүмүүсийг шийтгэнэ гэдгээ ч мэдэгджээ. 

Оршин суугчид мал хууль бусаар хил давуулах, хууль бус агнуур, хил дамнасан загас агнуурын талаарх мэдээллийг цагдаагийн байгууллагад мөн мэдэгдэх шаардлагатай гэжээ.

Хятадууд аравдугаар сарын 1-нээс эхлэн онлайнаар худалдан авч буй импортын бараа, ялангуяа  хүнсний хөлдөөсөн бүтээгдэхүүнийг Өвчний хяналт, урьдчилан сэргийлэх төвд заавал шалган нягталж байхаар шийдвэрлэсэн юм. 

Одоогийн байдлаар тус хотод  халдварын 200 орчим тохиолдол бүртгэгдээд байна. 

Эх сурвалж: Лента.ру