"Монгол мөрөөдөл" болох нь холгүй байгаа Эрээний боомт хэзээ нээгдэх нь монголчуудаас хамаарна

-Эрээн хэзээ нээгдэх вэ? Цаг тоолол дахин эхэллээ-

Эрээний боомт хаагдаад 20 гаруй хонож байна. Энэ сар хүрэхгүй хугацаанд монголчууд нусаа хацартаа наана гэгч л болж байна. Хоол нь нарийн ногоогүй, эмнэлгүүд нь эм тариургүй, үндэсний гэх үйлдвэрүүд нь түүхий эдгүй түрүүчээсээ үүд хаалгаа барьж эхэлжээ.

Монголчууд хятадгүй бол гал алдаж ч мэдэхээр болтлоо хараат болжээ. Сайжруулсан шахмал түлшний уут сав урдаас орж ирэхгүй байгаа учир 100кг-ын том цагаан уутанд савлаж түгээж эхэлжээ. Гэр хорооллын тэтгэврийн голдуу хөгшчүүд 100 кг-ын савлагаатай түлшээ дөхүүлэх гэж кран хөлслөх нь холгүй явдал чирэгдэл болж байгаа сурагтай. Энэчлэн цааш бүр ариун цэврийн цаасны эрэл сурал ч эхэлж мэдэхээр байна.  

Хэтрүүлж хэлбэл, Эрээний боомт нээгдээсэй гэх хүлээлт “Монгол мөрөөдөл” болж магадгүй янзтай.  

Уг нь Эрээнд халдварын шинэ тохиолдол бүртгэгдэлгүй 7 хонож, монголчууд хил нээгдэх хоног хугацааг хуруу даран тоолж эхлээд байтал өчигдөр дахин нэг тохиолдол илэрчихжээ. Ингээд хил нээгдэх тоолол дахиад л 1-ээс эхлэх болов.

Одоо нанадаж 21 хоног. Ямартай ч өвлийн эхэн сар дуусгах бололтой.

Даваа гарагт УИХ дахь Ардчилсан Намын бүлгийн дарга Д.Ганбат мэдээлэл  хийхдээ ““Эрээний боомт хэзээ хэвийн ажиллаж эхлэхийг БНХАУ-ын Элчин сайдаас тодруулсан. Ингэхэд манай улс халдварын нөхцөл байдлыг барьж, буурууж, шинжилгээ нь БНХАУ-ын лабораториудтай таараад байх юм бол 21 хоногийн дотор нээнэ гэж байна” гэдгийг дуулгалаа.

Элчин сайдын хэлсэн үгнээс “Монгол Улс халдвараа хумьж чадах эсэхээс хилээ хэзээ нээхээ шийднэ” гэсэн логик шууд уншигдаж байна.  Товчхондоо Эрээний хил хэзээ нээгдэх нь урд хөршөөс илүү монголчуудаас хамаарна гэсэн үг.

Боомт хаагдах шалтгаан анхнаасаа л Монголтой хил залгаа газар нутгуудад халдвар тархсантай холбоотой байсан нь бараг үнэн.  Тодруулбал, Өвөр Монголд "COVID-19" халдвар өнгөрсөн сараас тархаж эхэлснээс хойш дотоодод халдварласан нийт 163 тохиолдол илэрсний 14 нь Эрээн хотод, 144 нь Хятад-Монголын хилийн Эзнээ хошуунд бүртгэгдсэн байна.

Муухай дээрээ улцан гэдэг шиг  өнгөрөгч амралтын өдрүүдээр БНХАУ-ын Эрээн хотод Монгол Улсаас тээвэрлэгдэн ирсэн бараа бүтээгдэхүүнээс коронавирус илэрсэн гэж тус хотын Эрүүл мэндийн газар мэдээллээ. Үүнтэй холбоотойгоор  коронавирусний халдвар зөөвөрлөгдөн ирэхээс урьдчилан сэргийлэхийн тулд халдварын эрсдэл өндөр орнуудаас бараа бүтээгдэхүүн худалдан авахаа зогсоохыг оршин суугчдадаа уриалж, ойрын үед худалдан авалт хийсэн бол бүр устгахыг сануулж буй ажээ.

Хамгийн их газар нутгаар хиллэдэг хөрш оронд нь цар тахлын нөхцөл байдал ийм эрсдэлтэй  байхад ирэх хоёрдугаар сарын эхээр өвлийн олимпийн тоглолт болох  улс дотоодын нөхцөл байдлаа хатуу чанд хянахаас өөр яах билээ.

Манай дарга нар хилийн боомт хэзээ нээгдэхийг урд хөршийнхнөөсөө уйгагүй асууж сураглаж, бүр гуйж гувшиж байгаа бололтой юм. Элчин сайдтай нь ээлж дараалан уулзаж байна.

Гэхдээ  хэзээ нээгдэхийг тэднээс бус өөрсдөөсөө асуух нь бараг зөв зүйтэй юм шиг байна.

Хэрэв та нар  дотоодынхоо халдварыг хумьж чадвал 21 хоногийн дотор Эрээний боомтыг нээх боломжтой гэдгийг Элчин сайд нь илэрхийлчихлээ.

Нэмж хэлэхэд Эрээний тэг зогсолтыг цуцлах нэг нөхцөл нь шинжилгээний зөрүүгүй байх тухай Элчин сайдын сануулгад дурдсан нь бий.

Өөрөөр хэлбэл Монголд сөрөг гарсан шинжилгээ Хятадад эерэг гардаг талаархи яриа бий. Энэ тухайд УОК-ын дарга С.Амарсайхан: “PCR шинжилгээний хариу ялгаатай гардаг тохиолдол хэд хэдэн шалтгаантай. Манай улсын шинжилгээний аппарат нь БНХАУ, Өмнөд Солонгосийнхоос тохиргооны зөрүүтэй. Түүнчлэн манайд хэрэглэдэг аппаратаас өндөр түвшинд шинжилдэг” гэсэн тайлбар хийгээд буй. Юу ч гэсэн үг юм, бүр толгой эргэмээр.

 

Б.Тулга