Иракийн Ерөнхий сайд руу агаараас халдлага үйлджээ

Иракийн Ерөнхий сайд Мустафа аль-Казимигийн амь насанд халдах оролдлого ням гарагийн шөнө Багдад хотод болсон байна. Засгийн газрын тэргүүний  өөрөө сүүлд хэлсэнчлэн бэртэж гэмтээгүй аж.

Тэрээр өөрийн твиттер хуудаснаа "Бурханд талархаж байна, Би эрүүл саруул ард түмнийхээ дунд сайн байна, Иракийн нэрийн өмнөөс хүн бүрийг тайван, тэвчээртэй байхыг уриалж байна" гэж бичжээ. "Урвагчдын пуужингууд ард түмний аюулгүй байдлыг сахин хамгаалж буй манай баатарлаг хүчнийхний  тэсвэр хатуужил, тууштай байдлыг  нэг хором ч гэнэдүүлж  чадахгүй" гэжээ.

Al Hadath телевизийн мэдээлснээр, Ерөнхий сайдын хамгаалалтын албаны 10 ажилтан шархадсан байна. Үүнээс гадна засгийн газрын тэргүүний өргөөнд эд материалын  хохирол учирчээ. 

Багдадын ногоон бүс гэгдэх хэсэгт байрлах Ерөнхий сайдын ордон руу тэсрэх бодис бүхий  нисгэгчгүй нисэх онгоцны тусламжтайгаар халдлага үйлдсэн талаар “Аль Арабия” телевиз анх мэдээлсэн юм. Үүний дараа Иракийн аюулгүй байдлын албаныхан энэ мэдээллийг баталсан байна. "Ерөнхий сайд Аль-Казими гэмтэл аваагүй, эрүүл байгаа. Энэхүү бүтэлгүй оролдлоготой холбогдуулан аюулгүй байдлын албаныхан шаардлагатай арга хэмжээг авч байна" гэж Иракийн  Аюулгүй байдлын албаныхан мэдэгджээ.

Үүний зэрэгцээ Ерөнхий сайд хөнгөн бэртэж, эмнэлэгт хүргэгдсэн талаар өмнө нь Al Arabiya мэдээлж байсан.

Иракийн хэвлэл мэдээллийн хэрэгслүүдийн мэдээлснээр Засгийн газрын тэргүүн одоо аюулгүй газар байгаа аж.

Одоогийн байдлаар “ногоон бүс”-ийн бүх  нэвтрэх хэсэгт  хамгаалалтын арга хэмжээг  чангатгасан байна. Аль Хадатаас иш татан Иракийн Зэвсэгт хүчний мэдээлснээр "Ногоон бүсийн аюулгүй байдлын байдал тогтвортой бөгөөд хяналтад байна" гэжээ.