Г.Амартүвшин: Блокчэйн, Крипто валютын асуудлаар Санхүүгийн зохицуулах хороо, Монголбанк чанга дуугармаар байна

Төрөөс мөнгөний бодлогын талаар 2022 онд баримтлах үндсэн чиглэл батлах тухай  Улсын Их Хурлын тогтоолын төсөл /Монголбанк 2021.09.27-ны өдөр ирүүлсэн, анхны хэлэлцүүлэг/-ийг өнөөдрийн хуралдаанаарг хэлэлцүүлэх үеэр УИХ-ын гишүүн Г. Амартүвшин:  

 - Блокчэйн, Крипто валютын асуудал дээр Санхүүгийн зохицуулах хороо, Монгол банк чанга дуугармаар байна

Олон гишүүд блокчэйн, крипто валютын асуудал дээр хэлэлцэж саналаа хэлж байна. Үүн дээр Монгол банк, Санхүүгийн зохицуулах хороо ч гэсэн чанга дуугармаар байна. Энэ чинь эрсдэлтэй шүү, та нар алдвал өөрсдөө л хариуцаарай гэж байгаа нь  хариулт биш, гаргасан энэ койнууд нь аль нь яг жинхэнэ блокчэйн дээр үндэслэсэн, аль нь хоосон хөөс байгаа гэдэг дээр мэдээлэл өгөх шаардлагатай байна. Энэ дээр хатуу байр суурьтай байвал зүгээр.

Мөн Монгол банкны ерөнхийлөгчөөс асуухад,  ХААН банк зах зээлийн үйлчилгээний 70 хувийг бүрдүүлдэг. Хэрвээ сошиал ертөнцөөр яваад байгаа ХХБ-ны эцсийн хувьцаа эзэмшигч ХААН банкны нөлөө бүхий хувьцааг эзэмшиж байгаа нь үнэн бол Банкны тухай хуулийн 36.14 заалтыг зөрчиж байгаа юм биш үү. Хэрэв энэ том банкны нэр хүнд энэ асуудлаас болж унаж банкны систем ганхаж эхэлвэл сэргэх гэж хичээж байгаа эдийн засагт сөргөөр нөлөөлнө гэж бодож байна” гэлээ.

Харин энэ асуултын хариуд Монгол Банкны ерөнхийлөгч Б. Лхагвасүрэн: “ХААН банк бол Монголын томоохон арилжааны банк. Банкны тухай хууль бол 2010 он, 2018, 2021 он гээд олон нэмэлт өөрчлөлтүүд ороод явж байгаа. Банкны нөлөө бүхий  хувьцаа эзэмшигч хэн байх вэ, хувьцаа эзэмшигчийн дээд хязгаарыг тогтоож өгсөн бүх зохицуулалтууд байгаа.

ХХБ-ны  нөлөө бүхий хувьцаа эзэмшигч ХААН банкны хувьцааг эзэмшсэн эсэх асуудал дээр Монгол Банкны зүгээс тодруулга авсан. Мөн Японы мөрдөн шалгах үйл ажиллагаа явуулдаг компани руу захидал явуулж мэдээлэл авсан. Эдгээр тодруулга болгонд энэ нь үнэн гэж тогтоогдоогүй.

Монгол банкны зүгээс хянан шалгах үйл  ажиллагаа үргэлжилж байна. Эцсийн зөвшөөрөл бол олгоогдоогүй” гэлээ.

И.Шинэбат