ОХУ-д хамгийн их эрэн сурвалжлагдаж байсан гэмт хэрэгтэн  саятан байж таарав

ОХУ-д хамгийн их эрэн сурвалжлагдаж байсан гэмт хэрэгтнүүдийн нэг, 2000 онд Ханты-Мансийскийн автономит тойргийн (ХМАО) прокурор Юрий Бедеринийг захиалгаар хөнөөсөн хэрэгт буруутгагдаж байсан Юрий Чекин саятан болж, 70 сая рублийн үл хөдлөх хөрөнгө эзэмшдэг болох нь тогтоогджээ. Энэ тухай 11-р сарын 3-ны лхагва гарагт түүний өмгөөлөгч Михаил Пуртов мэдээлсэн байна. 

Юрий Чекин 70 сая рублээр үнэлэгдэх үл хөдлөх хөрөнгөтэй.  Баривчлагдахаасаа өмнө тэр хөрөнгөө  хүү, зээ охин нартаа хувааж өгөхөөөр  төлөвлөж байсан гэдгийг  Пуртов хэлжээ.

Аравдугаар сарын 28-нд Юрий Чекинийг хүү Сергей Чекин нь цагдаад хүлээлгэн өгсөн гэх мэдээлэл гарсан юм.

Юрий Чекинийг 20 жил хайсны эцэст  энэ оны аравдугаар сарын 26-нд баривчилжээ. Мөрдөн байцаалтын явцад тэрээр 1990-ээд онд Ханты-Мансийскийн автономит тойрог дахь Сангийн яамны хяналт, аудитын хэлтсийг удирдаж байсныг тодруулсан байна. Үүний зэрэгцээ тэрээр хувийн хоршоотой байсан бөгөөд 1993 оны турш газрын тос, байгалийн хийн компаниас 15,6 сая рубль хулгайлсан байжээ.  Энэ хэргийнх нь төлөө  прокурорын газраас Чекинд эрүүгийн хэрэг үүсгэсэн байна.

Үүний төлөө тэрээр прокурор Юрий Бедеринийг хөнөөх  захиалга өгсөн бөгөөд 2000 оны долдугаар сарын 25-нд прокурорыг  гэрийнх нь ойролцоо буудан хөнөөсөн байдаг.

Чекин мөн 1996, 1998 онд өөрийг нь мөнгөөр ​​хуурах гэж оролдсон хоёр танилынхаа амийг хөнөөсөн хэргийг зохион байгуулжээ. Уг тушаалыг гүйцэтгэсэн таван алуурчин эдгээр гэмт хэргүүдээр аль хэдийнэ ял сонсоод байгаа юм. 

Эх сурвалж: Лента ру