Л.Оюун-Эрдэнэ: Ч.Сайханбилэгийн Засгийн газрын үед Оюутолгойтой холбоотой гарсан шийдвэрүүдийг эргэж харна

Оюутолгойн гэрээнд өөрчлөлт оруулахтай холбоотой асуудлаар Монгол Улсын Ерөнхий сайд Л.Оюун-Эрдэнэ байр сууриа илэрхийллээ.

Тэрбээр “Гуравдагч улсын хөрөнгө оруулалт уул уурхайн салбарт  орсон гэдэг утгаараа энэ бол түүхэн том ололт энийг үгүйсгэж болохгүй. Оюутолгойн гэрээ хийгдэх явц түүний дараа Далд уурхайн бүтээн байгуулалтыг эхлүүлэхтэй холбоотой Ч.Сайханбилэгийн Засгийн газрын үед гарсан шийдвэрүүдийг эргэж харна. Татварын ашиггүй заалтуудыг баталсан зүйл бий. Татвартай холбоотой асуудлаар Арбитрын шүүх дээр нэхэмжлэл гаргаад жил гаруйн хугацаанд маргаан үргэлжлээд явж байна. Хоёрдугаарт зардал өсөх тусам Монгол Улс өрөнд ордог болсон. Зардал өсөхөд Монгол Улс Засгийн газар ямар ч буруугүй. Монголын талаас гаргасан алдаа биш учир үүссэн өрийг тэглэх санал тавьсан. 70 хувь буулгая. Бизнесийн нарийн тооцоо хийе гэсэн хөрөнгө оруулагчдын саналыг судалж байгаа. Дубайн гэрээ гэж бидний ярьдаг Далд уурхайн бүтээн байгуулалтыг санхүүжүүлсэн 15 компани бий. Дэлхийн банкнаас эхлээд олон байгууллагууд энд байгаа. Энэ удаад бид буулт хийхгүй зөвшилцөл хийж, харилцан ашигтай ажиллах ганцхан бодлого баримтална. Дубайн гэрээг батлахдаа Сангийн яам, Хууль зүй дотоод хэргийн яам, Засгийн газрын хэрэг эрхлэх газраас санал авах ёстой байсан. Гэтэл энэ бүх процесс явагдаагүй. Бүх хэлэлцээр хуулийн дагуу явна.” гэлээ

Г.Лхагва