41,6 тэрбумын урсгал зардалтай хүнд суртлын аппарат нэмж байгуулах төсвөө “Хэмнэлт”-ийн гэж тодотгов

Ирэх оны төсөв “хэмнэлт”-ийн, “хөгжил”-ийн гэхчлэн хэд хэдэн тодотголтойгоос гадна,  “Хөдөлмөр-Бүтээмж-Өсөлт” гэсэн уриатай. Бөхөөр бол  улсын цол чимэгтэй  аварга арслантай л дүйцэх байх.

Цар тахлын нөхцөл байдал, эдийн засгийн уналтын улмаас хүссэн хүсээгүй зардлаа хэмнэж, бүсээ чангалах шаардлагатай тулгалттай тулгарч байгаа. Энэ оны тухайд оны эцэс гэхэд төсвийн алдагдал 10 хувь руу дөхөх тооцоо бас бий. 

Хэмнэлт талаасаа ирэх оны төсөвт  гадаад томилолт, оффисын тавилга төхөөрөмж, автомашин худалдан авахгүй гэхчлэн шинэлэг заалт орсон нь талархууштай. Гэвч яг хэлэлцүүлгийн явцаас харахад хэмнэлтийн гээд байгаа тодотголдоо тохирч байгаа эсэх нь эргэлзээтэй байна.

Хоёр яам, дөрвөн агентлаг шинээр байгуулна

Төрийн алба данхайхын хэрээр төсвийн зарлага ихэсч алдагдал нэмэгддэг нь тодорхой.  2022 оны төсөвт төрийн албанаас тэтгэвэрт гарсан хоёр хүний оронд нэг хүн нэмж авах замаар төрийн албан хаагчдыг цомхотгоно гэсэн агуулга бий.  Гэвч үүнийхээ нөгөө талд төрийн албыг илүү томруулах санал орж ирсэн.

Ирэх оны төсвийн төсөлд 2 яам, 4 агентлагийг 2022 онд шинээр байгуулахаар тусгаад байгаа. Тодруулбал, Эдийн засгийн хөгжлийн яам, Цахим хөгжлийн яам байгуулна. Үүнээс гадна гадна И-Монгол академи, Сахилгын хороо, Ойн судалгаа хөгжлийн агентлаг, Боловсролын ерөнхий газар гэх Засгийн газрын 4 агентлагийг байгуулахаар тусгажээ. Зарим агентлагууд нь нэрнээсээ эхлээд ойлгомжгүй л байна.

Л.Оюун-Эрдэнэ Ерөнхий сайдын албыг авсаныхаа дараа хоёр яам нэмж байгуулна гэдгээ мэдэгдэж байв. Тиймээс УИХ-аар дэмжигдээд явах биз. Хоёр яамны тухайд тус тусдаа 80 хүнтэй буюу нийлбэрээрээ 160 хүнтэй данхар бүтэц бий болхоор байгаа юм.

Харин эдийн засаг хүндрэлтэй байхад  дөрвөн агентлаг нэмж байгуулах нь  цаг үеэ олоогүй асуудал гэсэн байр суурийг гишүүдийн зүгээс илэрхийлж буй.

41.6 тэрбум төгрөгийн урсгал зардалтай хүнд суртлын аппарат

Шинээр байгуулах хоёр яам, 4 агентлагийн 2022 оны урсгал зардалд 41,6 тэрбум төгрөг төлөвлөжээ. Хэрэв ийм хэмжээний хөрөнгийг бүтээн байгуулалтад зарцуулбал юу хийж болохыг тооцоолбол чамгүй асуудлаа шийдээд авах боломжтой нь тодорхой.

Төлөвлөгдөж буй 41,6 тэрбумыг задалж харвал:

• Эдийн засгийн хөгжлийн яаманд 4.4 тэрбум төгрөг
• Цахим хөгжил, харилцаа холбооны яаманд 1.9 тэрбум төгрөг
• И-Монгол академид 7.8 тэрбум төгрөг
• Боловсролын ерөнхий газарт 13.5 тэрбум төгрөг
• "Ойн судалгаа, хөгжлийн агентлаг"-ийг "Тэрбум мод" үндэсний хөдөлгөөний хүрээнд ирэх оноос байгуулахаар төлөвлөж, тус агентлагийн урсгал зардалд ирэх онд 12.5 тэрбум төгрөг төсөвлөсөн байна.

Хөгжлийн гэсэн тодотголтой зэрэгцээ хоёр  яам эдийн засгийг цахимжуулж, цахимыг эдийн засагжуулж чадах уу

Шинээр Эдийн засгийн хөгжлийн яам. Цахим хөгжлийн яамыг тус тус байгуулна гэж байгаа. Хоёулаа “Хөгжил”-ийн гэсэн нэршилтэй. Эндээс хөгжлийн бодлого нь эдийн засаг болон цахим гэсэн хоёр салангид чиглэлээр явах юм байна гэж уншигдаж байгаа юм. Өөрөөр хэлбэл бодлого, шийдвэр, шийдэл, гүйцэтгэл нь бие биедээ харилцан шингэддэгүй зэрэгцээ хоёр данхар бүтэц бий болох нь уу гэж харагдмаар.  

Мэдээж, хоёулаа л хөгжил ярина. Нэг нь эдийн засгийн хөгжил, нөгөө нь цахим хөгжил.  Ийм нөхцөлд хөгжлийн бодлого цогц байх чанар алдагдаж,  нэг гарт зангидагдаж чадах уу гэсэн эргэлзээ байна.