ЗАСГИЙН ГАЗАР: Хэн хэнийг хаана томилов

Засгийн газрын ээлжит хуралдаан болж байна. Хуралдаанаар цар тахлын нөхцөл байдал, Эрээний хил хаагдсан нөхцөл байдалтай уялдуулан авах арга хэмжээ зэрэг хэд хэдэн асуудлыг хэлэлцэнэ гэсэн мэдээлэл байгаа. Түүнчлэн хуралдаанаар хэд хэдэн томилгоо хийжээ.

ЗГХЭГ-ын дэд даргаар Д.Батбаатарыг томиллоо

Тэрбээр БСШУЯ-ны Төрийн нарийн бичгийн даргаар ажиллаж байгаад энэ сарын 6-ны өдрийн Засгийн газрын хуралдаанаар ТНБД-аас чөлөөлөгдсөн юм.

ЭРХЭЛЖ БАЙСАН АЖИЛ, АЛБАН ТУШААЛ

• 1986-1989 онд Архангай аймгийн АДХ-ын гүйцэтгэх захиргааны Хуулийн хэлтэст ахлах зөвлөх,
• 1989-1990 онд Налайх дүүргийн АДХ-ын гүйцэтгэх захиргааны Зохион зааварлах хэлтэст зохион байгуулагч,
• 1990-1992 онд Улсын Бага Хурлын Тамгын газарт зөвлөх,
• 1992-1996 онд Улсын Их Хурлын гишүүн,
• 1996-1998 онд Төрийн захиргаа, удирдлагын хөгжлийн институтийн багш,
• 2000-2001 онд Улсын Их Хурлын даргын зөвлөх,
• 2001-2002 онд УИХ-ын Тамгын газрын Ерөнхий нарийн бичгийн дарга,
• 2002-2008 онд Улсын Мэргэжлийн Хяналтын газрын дарга,
• 2008-2010 онд Монгол Улсын Ерөнхий сайдын зөвлөх,
• 2010-2011 онд Өмнөговь аймаг дахь Засгийн газрын бүрэн эрхт төлөөлөгч,
• 2011-2013 онд “Эрдэнэс Оюутолгой” ХХК-ийн захирал,
• 2013-2014 онд УИХ дахь МАН-ын бүлгийн ажлын албаны дарга
• 2014-2015 онд Монгол Улсын Шадар сайдын ажлын албаны дарга
• 2015-2020 онд Монголын хөдөлмөрийн аюулгүй ажиллагаа, эрүүл ахуй, байгаль орчны нийгэмлэгийн ерөнхийлөгч,
• 2016-2020 онд “Мошеа Эко” ХХК-ийн захирал,
• 2017 оноос МАН-ын Хяналтын ерөнхий хорооны дарга

Харин ЗГХЭГ-ын дэд даргаар ажиллаж байсан Б.Солонгыг ХЗДХЯ-ны дэд сайдаар томилсон юм.

Б.Солонгыг ХЗДХ-ийн дэд сайдаар томилов

ЗГХЭГ-ын дэд даргаар ажиллаж байсан  Б.Солонгыг ХЗДХЯ-ны дэд сайдаар томиллоо.  Өмнөх  дэд сайд С.Баатаржав Монгол Улсаас Унгар улсад суугаа Онц бөгөөд Бүрэн эрхт Элчин сайдаар томилогдож, өнгөрсөн долоо хоногт Ерөнхийлөгч У.Хүрэлсүхээс итгэмжлэхээ гардаж аваад байгаа юм.

Б.Солонго ЗГХЭГ-ын даргаар ажиллаж байх үедээ "Рио Тинто" компанитай холбоотой асуудлаар "Оюутолгой" ордын ашиглалтад Монгол Улсын эрх ашгийг хангуулах тухай УИХ-ын тогтоолын дагуу Засгийн газраас байгуулагдсан Ажлын хэсгийн гишүүнээр ажиллаж байгаа. Хэдийгээр түүний албан тушаал өөрчлөгдөж байгаа ч дээрхи ажлын хэсгийн гишүүнээрээ үргэлжлүүлэн ажиллана гэсэн мэдээлэл байна.

БШУЯ-ны Төрийн нарийн бичгийн даргаа Л.Цэдэвсүрэнг томиллоо

Өнөөдрийн Засгийн газрын ээлжит хуралдаанаар БШУЯ-ны Төрийн нарийн бичгийн даргаар  Л.Цэдэвсүрэнг томиллоо. Түүний хувьд тус яамны сайдаар ажиллаж байгаад У.Хүрэлсүхийн Засгийн газар огцорсны дараа чөлөөлөгдөж, Ерөнхий сайд Л.Оюун-Эрдэнийн зөвлөхөөр ажиллаж байгаад салбартаа эргэн ирж байна.