Режеп Эрдоган: НҮБ-ын Аюулгүйн Зөвлөл хүн төрөлхтний хувь заяаг шийдэх эрхгүй

 -Эрдоган Дэлхийн хоёрдугаар  дайны ялагч  "цөөнх"-ийг эсэргүүцэв-

Туркийн Ерөнхийлөгч Режеп Тайип Эрдоган  Анголд  айлчлах үеэрээ тус улсын парламентад үг хэлэхдээ  Дэлхийн 2-р дайнд ялсан "цөөн"-хийн  эсрэг санаа илэрхийлж, НҮБ-ын Аюулгүйн зөвлөл дэлхийн улс орнуудын хувь заяаг шийдэх эрхгүй гэж мэдэгджээ.  Түүний энэ илтгэлийн бичлэг Эрдоганы албан ёсны фэйсбүүк хуудсанд нийтлэгдсэн байна.

Статус-кво

Дэлхий ертөнц өөрчлөгдөж, дипломат харилцаа, худалдаа, олон улсын харилцаа эрс өөрчлөгдөж байгаа энэ үед дэлхийн аюулгүй байдлын архитектур урьдын адил хэвээр байгаа гэж төсөөлөхийн аргагүй нөхцөл байдал бий болж байна гэдгийг Туркийн лидер тэмдэглэв.
Үүний зэрэгцээ өөрчлөлтийн шаардлагыг үл тоомсорлох нь Дэлхийн хоёрдугаар дайны дараа үүссэн статус-квог хэвээр хадгалах гэсэн тууштай оролдлого юм гэжээ. 

Эрдоганы ном
10-р сарын эхээр Режеп Тайип Эрдоган "Дэлхий ертөнц шударга байх боломжтой"  гэсэн нэртэй ном хэвлүүлжээ. Тэрээр дэлхийн улс төрийн тулгамдсан асуудлууд, ялангуяа шударга бус байдал, цагаачлал, шилжилт хөдөлгөөний хямрал, олон улсын терроризм ба исламофоби, ялгаварлан гадуурхалт, давхар стандартад анхаарлаа хандуулжээ.

 Туркийн Ерөнхийлөгч Орос, АНУ, Хятад, Их Британи, Францыг багтаасан НҮБ-ын Аюулгүйн Зөвлөлийг үндсээр нь шинэчлэх ёстой гэсэн байр суурийг  илэрхийлжээ. Эрдоганы үзэж байгаагаар өнгөрсөн үеийн шаардлагын дагуу байгуулагдсан байгууллагуудаар дамжуулан орчин үеийн асуудлыг шийдвэрлэх нь боломжгүй юм. Түүгээр ч барахгүй эдгээр байгууллагууд шинэ асуудал үүсгэдэг гэжээ.

Францын хариу үйлдэл
Францын Гадаад хэргийн яам НҮБ-ын Аюулгүйн Зөвлөлийг шинэчлэх тухай Эрдоганы саналыг дэмжжээ.

Парис Аюулгүйн Зөвлөлийг өргөтгөх санал санаачлагыг удаан хугацааны турш  дэмжиж ирсэн бөгөөд байнгын болон байнгын бус гишүүдийн хоёр ангиллыг өргөжүүлэхийг дэмжиж байсныг яамныхан дахин сануулжээ.

Оросын байр суурь

2016 онд ОХУ-аас НҮБ-д суугаа Байнгын төлөөлөгчийн орлогч Владимир Сафронков гишүүн орнуудын тоог нэмэгдүүлэх НҮБ-ын Аюулгүйн Зөвлөлийг шинэчлэлийн  хувилбарыг үгүйсгэхгүй гэдгээ  мөн илэрхийлж  байв.. Түүний хэлснээр Москва "шинэчлэлийн томъёолол нь НҮБ-ын гишүүн орнуудын хамгийн өргөн дэмжлэгийг авах ёстой"  гэдэгт  итгэлтэй байгаа гэжээ.

Үүний зэрэгцээ ОХУ шинэчлэлийн үр дүн ямар байхаас үл хамааран  Аюулгүйн Зөвлөлийг  Ази, Африк, Латин Америкийн хөгжиж буй орнуудын төлөөллөөр өргөжүүлэхийг зарчмын хувьд дэмжиж байна гэж Сафронков нэмж хэлжээ. Тэрбээр  Аюулгүйн Зөвлөл хамгийн ихдээ   20 гаруй гишүүнтэй байх нь тус байгууллагын оюун ухааны боломжит "тааз" бөгөөд энэ нь ажлын үр дүнг хадгалахад  тустай гэж үзэж байгаагаа нэмж тодотгосон байна.