Нас барсан эмэгтэйг Иракийн парламентад сонгожээ

Санал хураахаас хоёр сарын өмнө коронавирусийн халдварын улмаас нас барсан эмэгтэй Иракийн парламентад сонгогджээ. Энэ тухай Аль Арабия телевизийн мэдээлэлд дурджээ. 

Багдад хотын оршин суугч Ансам Мануэл бие даан нэр дэвшиж сонгуульд оролцож, 2,400 санал авсан боловч өнгөрөгч зун коронавирусийн халдварын улмаас эмнэлэгт нэг сар гаруй хэвтэж эмчлүүлсэн ч  8-р сарын сүүлээр нас баржээ.

Нас барсан нэр дэвшигчийг парламентад оруулсанд олон нийтийн зүгээс ихээхэн шүүмжлэлтэй хандаж байгаа бөгөөд  Иракийн эрх баригчдыг хуурамчаар үйлдсэн гэж буруутгаж байв. Гэвч  талийгаачийн ар гэрийнхэн юу болсныг тайлбарлажээ. 

Хамаатан садан нь талийгаач Ансам Мануэль бие даан нэрээ дэвшүүлсэн боловч өвчнөө ялан дийлж чадаагүй тухай мэдээлжээ. Түүний нэрийг техникийн шалтгаанаар саналын хуудаснаас хасаагүй байжээ. Харин  найз нөхөд, дэмжигчид нь  "дурсамж, талархал, хүндэтгэлийн тэмдэг" болгож түүний төлөө санал өгсөн бөгөөд ихэнх  сонгогчид юу болсныг огт мэдээгүй байжээ.

Хууль эрх зүйн үүднээс саналын тоогоор дараагийн нэр дэвшигч түүний оронд парламентад суудал авна.

Иракт 2022 онд товлогдсон сонгуулийг хугацаанаас нь өмнө явуулсан бөгөөд ажиглагчид ихээхэн  заль  луйвартай сонгууль болсон хэмээн буруутгаж байгаа бөгөөд зарим нам сонгуулийн  дүнг хүлээн зөвшөөрөхөөс татгалзсан байна. Мөн сонгогчдын  ирц хамгийн бага буюу 30 гаруйхан хувьтай болсон юм.

Сануулахад, энэ сарын 10-нд Иракт парламентын сонгууль болсон бөгөөд өнгөрөгч  14-нд сонгуулийнхаа дүнг танилцуулсан юм. Тус улсад сонгуулийн насны   24 сая гаруй иргэн бий. Сонгуульд 3240 орчим нэр дэвшигч оролцсон эдгээрийн 940 нь эмэгтэй нэр дэвшигчид байв.