2022 оны САЙД нарын төсөв

Улс төрчдөөс “Бүх цаг үеийн хамгийн чадваргүй Засгийн газар” гэдэг тодорхойлолтыг аваад буй Л.Оюун-Эрдэнийн Засгийн газар 2022 оны төсвийг Парламентад өргөн барихдаа PR хийхээ мартсангүй. Сар гаруй шатахуун, түлшний хомстлоор ард түмэндээ гэнэтийн бэлэг барьсан Засгийн газар ажил хэрэгч харагдахыг хүссэн үү ирэх оны төсөвт “ХӨДӨЛМӨР, БҮТЭЭМЖ, ӨСӨЛТ” гэдэг уриа өгсөн. Магадгүй түүхэндээ анх удаа Монгол Улсын төсөв уриатай болсон нь энэ байж мэднэ. Гоё чамин уриаг урьтал болгосон 2022 оны төсвийн ерөнхий мэдээллээс одоо цухас дурдъя. Монгол Улс ирэх онд 15.6 их наядын орлого олж, 18 их наядын зарлага гаргаж, 2.3 их наядын алдагдал хүлээх тооцоог Л.Оюун-Эрдэнийн Засгийн газраас хийсэн байна.

Орлогоосоо давсан зарлагатай өөрөөр хэлбэл алдагдалтай төсвийг гайхалтай сайн төсөв гэж магтах аргагүй. Гэхдээ Засгийн газар ингэж магтуулахыг хүсэж байна. Ийм учраас “ХӨДӨЛМӨР, БҮТЭЭМЖ, ӨСӨЛТ” гэдэг уриагаар PR хийж байна. Ганцхан жилийн хугацаанд төсвийн зарлагын хэмжээ 4 их наядаар нэмэгдэж, 18 их наяд болсныг Засгийн газраас өргөн барьсан төсвийн хуулийн төслөөс харж болно.

Данхар төрийн зардал өндөр байдаг. Цомхон ухаалаг төрийн тухай ганцхан жилийн өмнө ярьж явсан эрх баригчид яамдын тоог нэмэхээр тохироогоо хийжээ. Тийм ч учраас ирэх оны төсөвт Засгийн газрын бүтцэд шинээр нэмэгдэх Эдийн засаг, хөгжлийн яам, Цахим хөгжил, харилцаа холбооны яамыг байгуулахад шаардагдах санхүүжилтийг тусгасан байна .

Засгийн газрын сайд нар 2022 онд ямар хэмжээний төсөв захиран зарцуулахаар хуулийн төсөлд туссантай танилцана уу.

-УЛС ТӨРЧДӨД ЗОРИУЛСАН ТӨСӨВ-

Ардчилсан намынхан 2022 оны төсвийг Улс төрчдөд зориулсан төсөв гэж шүүмжилсэн. Тус намын дэд дарга Ч.Отгочулуу ирэх оны төсөв “Ардаа алагчилсан төсөв” болсон гэж өчигдөрхөн мэдэгдээд авлаа.  Хэнтий аймгийн сум болгонд спортын ордон, соёлын ордон, музей барихаар өндөр төсөв тавьж бусад иргэдээ ялгаварласан гэж тэрээр мэдэгдсэн. Түүнчлэн нэг намын ноёрхлыг бэхжүүлэхийн тулд Соёлын сайдад их хэмжээний мөнгө төсөвлөж социализмыг магтан дуулсан кино, танилцуулгыг санхүүжүүлэх ажлыг зохион байгуулах гэж байна гэж хардаж байгаагаа ч хэлсэн.

-2022 ОНД ТЭТГЭВЭР, ТЭТГЭМЖ НЭМЭХГҮЙ-

Ирэх онд халамжийн төрөл зүйл давхардлыг арилгаж шинэчлэл хийнэ. Ингэхдээ халамж хэлбэрээр олгож буй мөнгөн дүнг бууруулахгүй. Харин халамжийг олгохдоо бүтээмж, хөдөлмөр эрхлэлттэй уяж өгөхөө Сангийн сайд мэдэгдсэн. 

-НАЙМАН ШИНЭЧЛЭЛИЙГ ТӨСВИЙН ХҮРЭЭНД ХИЙНЭ-

1. Хөгжлийн төслүүдийг үргэлжлүүлж, хөрөнгө оруулалтыг дэмжих замаар эдийн засгаа сэргээнэ.
2. Төрийн өмчит компаниудад бүтцийн өөрчлөлт хийнэ.
3. Халамжаас хөдөлмөрт шилжих бодлого хэрэгжүүлнэ. 
4. Хувийн хэвшлийн чиг үүргийг төр хэрэгжүүлдэг байдлаас татгалзаж, төр худалдан авдаг тогтолцоонд шилжинэ
5. Төрийн үйлчилгээг цахимжуулах ажлыг эрчимжүүлнэ.
6. Дэд бүтцийн төслүүдийг нэн тэргүүнд хэрэгжүүлж, үрэлгэн хөрөнгө оруулалтаас хөгжлийн хөрөнгө оруулалт руу шилжинэ. 
7. Улаанбаатар хотын түгжрэлийг бууруулахад 420 тэрбум төгрөг зарцуулж томоохон бүтээн байгуулалтын ажлууд хийнэ.
8. Ирээдүйн өв сангаар баталгаажсан “Хуримтлалтай Монгол хүүхэд”, “Баялагтаа эзэн Монгол” иргэдийг бий болгоно. 

Г.Жүгдэр