Макрон Талибаны  засаглалын доорхи Афганистаны эмэгтэйчүүдийн амьдралыг "аймшиг" гэв

"Талибан" радикал хөдөлгөөний зэвсэгт этгээдүүд Афганистаныг эзлэн авсны дараа тус улсын эмэгтэйчүүдийн байдал хүнд байна" гэж Францын Ерөнхийлөгч Эммануэль Макрон "France Inter" радиод өгсөн ярилцлагадаа  байр сууриа илэрхийлжээ.

"Сүүлийн жилүүдэд сурч боловсрох, спорт, урлаг соёл зэрэгт  хамрагдах боломжтой болсон олон эмэгтэйчүүд гэнэт  энэ бүх цонх, хаалга хэрхэн хаагдахыг харлаа" гэж тэрбээр онцолжээ. Олон улсын хамтын нийгэмлэг, тэр дундаа Франц улс Афганистаны эмэгтэйчүүдэд туслах, тэдний нөхцөл байдлыг сайжруулахын тулд бүхий л хүчин чармайлт гаргахаа  онцлон тэмдэглэв.

Талибанчууд залуу охид эмэгтэйчүүдэд боловсрол эзэмших эрхийг баталгаажуулах хүртэл Парис тэдний дэглэмийг хүлээн зөвшөөрөхгүй гэж Макрон хэлэв. Тэрээр талибуудын эрх мэдлийг ирээдүйд хүлээн зөвшөөрөх гол нөхцөлүүдийн нэг нь афган эмэгтэйчүүдийн эрх, эрх чөлөөг дээдлэх, жендерийн тэгш байдлыг хүндэтгэх явдал гэжээ.

Өнгөрөгч 9-р сарын 20-ны өдөр Талибчууд эрчүүд гүйцэтгэж болохуйц ажил хөдөлмөр эрхэлдэг эмэгтэйчүүдийг гэртээ байж, ажилдаа явахгүй байхыг тушаасан.  Гэхдээ  Афганистаны эрх баригчид эрчүүдээр сольж болохгүй эмэгтэйчүүдийн ажлын байрыг хадгалж үлджээ, Жишээлбэл, эмэгтэйчүүдийн бие засах газарт ажилладаг эмэгтэй ажилчид.