Т.Доржханд: Засгийн газар ажлаа хий, Гэр хорооллын иргэдийн дийлэнх нь галгүй байна

УИХ-ын гишүүн Т.Доржханд Монгол Улсын Ерөнхий сайд Л.Оюун-Эрдэнээс “Сайжруулсан шахмал түлшний хангамж”-ийн талаар асуулга тавьж буйгаа мэдэгдлээ.

Тэрбээр “УИХ, Засгийн газар ажлаа хийх хэрэгтэй байна. Гэр хорооллын иргэд маань шахмал түлш авахаар урт дараалал үүсгэн хонон, өнжин зогсож байна. Улаанбаатар хотын хүн амын 60 гаруй хувь нь гэр хороололд амьдардаг. УИХ-ын 22 гишүүн Улаанбаатар хотоос сонгогдсон. Бүгдээрээ гэр хорооллын хөгжил, дулаан цахилгааны тухай ярьдаг. Гэтэл гэр хорооллын иргэдийн дийлэнх нь галгүй байна. Гэвч хэн ч ярихгүй байна. Бид Засгийн газарт бүх эрх мэдлийг ковидын хуулиар өгсөн. Харин одоо Засгийн газраас хариуцлага шаардаж ажиллана” гэлээ.

Сайжруулсан түлш авахын тулд заавал өөрийн биеэр ир гэж шаардлага тавьснаас хөл, гар муутай хэвтрийн ахмадуудад, ковидоор өвчилсөн иргэд, хөгжлийн бэрхшээлтэй хүмүүст хүндрэл учирч байна. Зуны саруудад шахмал түлшний нөөцөө бүрдүүлж чадаагүй, хүнлэг бус шийдвэр, арга барилаар ард иргэддээ “Сайн түлш”-ийг худалдан борлуулж байгаа дарга нарт хариуцлага тооцохыг энэ үеэр шаардсан юм.

Г.Жүгдэр