Афганистаны шоронгоос суллагдсан хүн амины хэрэгтнүүд эмэгтэй шүүгчдийг мөшгөж байна

Өнгөрөгч наймдугаар сард Талибчууд Афганистанд эрх мэдлийг гартаа авсны дараа ял эдэлж байсан олон мянган хоригдлыг сулласан бөгөөд тэдний ихэнх нь хүн амины хэрэгтэй алуурчид байжээ. Тиймээс тус улсад шүүгчээр ажиллаж байсан эмэгтэйчүүд өшөө авахаас айж, зугтаж, нуугдахаас өөр аргагүй болсон байна.

Тэдний нэг шүүгч эмэгтэй ярихдаа “карьерынхаа туршид хүчирхийлэл, аллага, эрүүдэн шүүх зэрэгт буруутай олон зуун эрчүүдийн эмэгтэйчүүдийн эсрэг хүчирхийлэл үйлдсэн хэргийг шүүж байсан”гэжээ.Талибчууд гэмт хэрэгтнүүдийг шоронгоос сулласанаас хойш хэдхэн хоногийн дараа түүнд үхлийн аюул заналхийлж эхэлжээ.  Тиймээс гэр бүлийнхэнтэйгээ хамт тэр даруй гэрээсээ зугтахаар болжээ.

Тэрбээр ярихдаа “Машинаар хотоос гарахдаа танигдахгүйн тулд бурка зүүсэн байсан. Аз болоход бид Талибаны бүх шалган нэвтрүүлэх цэгийг давсан"гэжээ. Тэднийг явсны дараахан түүний байшинд талибаны зэвсэглэсэн дайчид ирсэн гэж хөршүүд нь дуулгажээ. Тэд хэнийг хайж ирсэн нь тодорхой.

Шүүгчээр ажиллаж байсан өөр нэг Афган эмэгтэй хэлэхдээ“эхнэрээ хөнөөсөн ялтан шоронгоос суллагдсаныхаа дараа түүнийг ална хэмээн заналхийлдэг байсан” гэжээ. Тухайн үед тэр заналхийллийг ноцтой хүлээж аваагүй ч талибууд засгийн эрхэнд гарсны дараа заналхийлсэн дуудлага  байнга ирж эхэлсэн байна.

Одоогийн байдлаар Афганистанд эмэгтэйчүүдийн эрхийг хамгаалах чиглэлээр анхдагч байсан 220 гаруй шүүгчид нуугдаж байна. Тэд утасны дугаараа сольж, нуугдаж амьдарч байгаа бөгөөд байнга нүүх шаардлагатай болдог. Тэдний амьдарч байсан байшинд талибчууд ирж хуучин эзэд нь хаана байгааг асууж сурагласан гэдгийг хөршүүд болон найз нөхөд нь мэдээлжээ.Ингэхээр талибууд тэднийг мөрдөж мөшгөсөн хэвээр байгаа ажээ.