Б.Жавхлан: Улсын 2022 оны төсөв нэлээн амбицтай болсон

Засгийн газар улсын 2022 оны төсвийг хэлэлцэж, маргааш УИХ-д өргөн барихаар болов. Сангийн сайд Б.Жавхлан “Ирэх оны төсөв 2019 оноос эхлэн 2020 онд үргэлжилж байгаа эдийн засгийн сорилт, уналтыг тогтворжуулах, дунд урт хугацаанд тогтвортой хөгжлийн суурийг баттай бий болгохыг зорьсон нэлээн амбицтай төсөв болсон” хэмээн тодотголоо.  

Найман чиглэлээр “Хөдөлмөр-бүтээмж- өсөлт” гэсэн уриатай төсвийн шинэчлэл хийх зорилт тавьж байна.

1. Хөгжлийн төслүүдийг эхлүүлэх, хүртээмжтэй өсөлтийг хангах, экспортыг нэмэгдүүлэх, хөрөнгө оруулалтыг дэмжих замаар эдийн засгаа сэргээнэ.

2. Төрийн өмчит компаниудад бүтцийн шинэчлэл хийнэ.

3. Ирээдүйн өв сангаар баталгаажсан хуримтлалтай монгол хүүхэд, баялагтаа эзэн монгол иргэдийг бий болгоно.

4. Халамжаас хөдөлмөрт шилжих бодлогыг үе шаттай хэрэгжүүлнэ.

5. Хувийн хэвшил хэрэгжүүлэх боломжтой чиг үүргээс төр татгалзаж, стандарт, чанар, өрсөлдөөнд суурилсан үйлчилгээг төр худалдан авч, төрийн албаны бүтцийг шинэчилнэ.

6. Төсвийн зарцуулалтын үр ашгийг сайжруулна.

7. Үрэлгэн хөрөнгө оруулалтаас хөгжлийн хөрөнгө оруулалт руу шилжинэ.

8. Улаанбаатар хотын түгжрэлийг бууруулахад онцгой анхаарна.

Хүүхдийн мөнгийг халамжаас хуримтлал руу үе шаттай шилжүүлнэ. 2022 оны 01 дүгээр сарын 01-нээс 07 дугаар сарын 01 хүртэл хүүхэд бүрт 100 мянган төгрөгийг сонголттой олгоно. Тухайн мөнгийг авч хэрэглэж болохоос гадна хуримтлал үүсгэх боломжтой. Харин 2022 оны 07 дугаар сарын 01-нээс эхлэн 50 мянган төгрөгийг хадгаламжинд хуримтлуулж, 50 мянган төгрөгийг гар дээрээ авч болно. Мөн ирэх 2022 онд тэтгэвэр тэтгэмжийг нэмэхгүй гэдгийг Сангийн сайд Б.Жавхлан хэллээ.