Германы  Бундестагийн сонгуульд Социал демократ нам ялалт байгуулснаа зарлав

Ням гарагт Германы Бундестагийн сонгуулийн санал хураалт эхэлсэн.  Энэ. удаагийн сонгууль хамгийн олон нэр дэвшигч, мөн нам эвсэл холбоод өрсөлдөж байгаа гэдгээрээ онцлогтой.  Мөн сүүлийн 16 жилд анх удаа Анжела Меркельгүй сонгууль хэмээн тодотгож байна. 

Сонгуулийн албан ёсны дүнг өнөөдөр орой зарлах товтой байгаа ч урьдчилсан байдлаар намуудын авсан саналын тоо гараад байна.  
Тухайлбал, одоогоор Социал демократ нам (SPD)  энэ удаагийн парламентын сонгуульд 25.7 хувийн санал авч ялалт байгуулжээ. Үүнийг тус улсын Холбооны Сонгуулийн Хороо 299 тойргийн бүх саналын хуудсыг тоолсон үр дүнд үндэслэсэн урьдчилсан мэдээлэл гэж байгаа ч  саналын хуудсыг зарим тойргуудад бүрэн тоолж дуусаагүй гэсэн мэдээлэл бас байна. 

Хоёрдугаар байрыг сонгогчдын 24.1хувийн дэмжлэг авсан Христийн ардчилсан болон Христийн нийгмийн холбоо (CDU / CSU)  намуудын эвсэл   эзэлжээ.

Түүнчлэн Ногоонууд 14.8%, Чөлөөт Ардчилсан Нам (FDP) 11.5%, Германы Альтернатив 10.3%-ийн саналыг  авсан нь урьдчилсан байдлаар  тодорхой болоод байна. 

Харин Зүүний нам 4.9 хувийн санал авчээ. Тус нам тойрогтоо гурван  шууд мандат авсныхаа ачаар парламентад орж байна гэж Deutsche Welle мэдээлэв.

Тус улсын сонгууль нь тойргийн болон хувь тэнцүүлсэн холимог системээр явагддаг юм. 

Сонгуулийн урьдчилсан дүнтэй холбоотойгоор дараагийн канцлер хэн болох вэ гэсэн асуулт дэлхий нийтийн анхаарлыг татаж байна.  Хэрэв сонгуулийн урьдчилсан дүнгээс харвал Социал-демократ намаас нэр дэвшигч Олаф Шольц Канцлер болох  магадлал өндөр байгаа ч ХАХ/ХНХ эвслээс нэр дэвшигч Армин Лашет Христийн Ардчилсан холбоо намын тэргүүний хувиар Засгийн газар байгуулах талаар хэлэлцээ хийх бодолтой байгаагаа  мэдэгдсэн байна. 

Эх сурвалж.yagdex ru.news