Крымийн талаархи Эрдоганы мэдэгдэлд Кремль дургүйцлээ илэрхийлэв

Туркийн Ерөнхийлөгч Режеп Тайип Эрдоганы Крымийн талаархи шинэ мэдэгдэлд харамсаж байгаагаа Кремлийн төлөөлөгч Дмитрий Песков мэдэгджээ.

Түүний хэлснээр, Москва Эрдоганы хэлсэн үгийг өөрт  нь хаягласан хэмээн үзэж байгаа аж. Песков сэтгүүлчдийн асуултад хариулахдаа "Эрдоганы Орос улсад хийх айлчлалын бэлтгэл ажил хангагдаж байгаа энэ үед тэр Крымын асуудлаар ийм мэдэгдэл хийж байгаад ОХУ харамсч байна" гэжээ.

ОХУ -ын Ерөнхийлөгчийн хэвлэлийн нарийн бичгийн дарга мөн Крымын асуудлаарх Туркийн байр суурийг Москва сайн мэддэг бөгөөд Кремль үүнтэй санал огт нийлэхгүй байгааг  дурджээ. Орос Анкаратай хоёр талын харилцааг хөгжүүлэхэд анхаарлаа хандуулахыг хүсч байна гэж Песков нэмж хэлэв.

Эрдоган  өмнө нь НҮБ-ын Ерөнхий Ассамблейн 76-р чуулганы улс төрийн ерөнхий хэлэлцүүлгийн  үеэр хэлсэн үгэндээ, "Крымыг оролцуулаад Украины нутаг дэвсгэрийн бүрэн бүтэн байдал, бүрэн эрхт байдлыг хадгалах нь чухал гэж Турк үзэж байна" гэж тэмдэглэжээ.

Үүнтэй зэрэгцэн Украины Ерөнхийлөгч Владимир Зеленский "Крымыг ОХУ-ын бүрэлдэхүүнд авсныг хүлээн зөвшөөрөхгүй байгаагаа илэрхийлсэн  Эрдоганд талархал илэрхийлжээ. Тэрээр мөн Украйн, Туркийн харилцааны стратегийн шинж чанарыг тэмдэглэж, улс төр, худалдаа-эдийн засаг, цэрэг-техник, хүмүүнлэгийн салбарт хоёр талын хамтын ажиллагааг өргөжүүлэхийн ач холбогдлыг онцолсон байна.