ТОЙМ:Шинэ эргэлтийн бодлого, шинэ Даян аварга цолтон төрсөн долоо хоног

ЕРӨНХИЙЛӨГЧ

Хил хамгаалах байгууллагынхантай уулзлаа

Баасан гарагт тохиосон /2021 оны есдүгээр сарын 17-ны өдөр/ Монгол Улсад орчин үеийн хил хамгаалах байгууллага үүсэж хөгжсөний 88 жилийн ой, “Хилчдийн өдөр”-тэй холбогдуулан Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх Хил хамгаалах ерөнхий газарт ажиллалаа.Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх хил хамгаалах байгууллагын алба хаагчид, бие бүрэлдэхүүнтэй уулзах үеэрээ “уудам дэлгэр эх орныхоо 8252 км 658 м урттай дархан хилийн халдашгүй дархан байдлыг амаргүй нөхцөлд нэр төртэй хамгаалж байгаа“ хилчиддээ гүн талархал дэвшүүллээ.

Элчин сайд нарт итгэмжлэх жуух бичгийг нь гардууллаа

Ерөнхийлөгч У.Хүрэлсүх  энэ сарын 15-нд Монгол Улсаас  гадаад уосад суух зарим элчин сайд нарын итгэмжлэх жуух бичгийг нь гардууллаа.

Тодруулбал, Бүгд Найрамдах Беларусь Улсад суух Онц бөгөөд Бүрэн эрхт Элчин сайд Батсүхийн Баярсайхан, Монгол Улсаас Холбооны Бүгд Найрамдах Герман Улсад суух Онц бөгөөд Бүрэн эрхт Элчин сайд Бирваагийн Мандахбилэг, Монгол Улсаас Бүгд Найрамдах Казахстан Улсад суух Онц бөгөөд Бүрэн эрхт Элчин сайд Доржийн Баярхүү, Монгол Улсаас Бүгд Найрамдах Турк Улсад суух Онц бөгөөд Бүрэн эрхт Элчин сайд Гомбосүрэнгийн Мөнхбаяр нарт Итгэмжлэх жуух бичгийг нь гардуулж, амжилт хүсэв.

 

Эдийн засгийг эрчимжүүлэх “Шинэ эргэлтийн бодлого” хэрэгжүүлнэ

Улирч буй долоо хонот улс төрийн хүрээнд уулзалтууд шил шилээ харан үргэлжлэв. Даваа гараг /2021.09.13/ Монгол Улсын Ерөнхийлөгчийн ивээл дор   зохиогдож буй “Цар тахлын үеийн эдийн засгийн сэргэлтийг эрчимжүүлэх нь” төр, хувийн хэвшлийн зөвлөлдөх уулзалтаар эхлэв.

Энэ уулзалтад төрийн гурван өндөрлөг оролцож нэг цонхоор харж байгаагаа мэдээллээ. МУ-ын Ерөнхийлөгч У.Хүрэлсүх хэлсэн үгэндээ “Цар тахлын улмаас өнгөрсөн онд эдийн засаг 4.5 хувиар агшсан ч энэ оны эхний хагас жилийн байдлаар 6.3 хувиар өсч, сэргэлт ажиглагдаж эхэллээ” гэдгийг онцолсон бол УИХ-ын дарга Г.Занданшатар “Иргэдийн амьжиргааг дээшлүүлэх эдийн засгийн шинэ загварыг  боловсруулна” гэдгээ илэрхийллээ.

Харин гүйцэтгэх засаглалын тэргүүн энэ үеэр “Монгол Улсын эдийн засаг өнгөрсөн онд 5.3 хувиар агшсан нь 90-ээд оноос хойш тохиолдсон хоёр дахь агшилт юм” гэдгийг онцлоод  эдийн засгийг эрчимжүүлэх шинэ эргэлтийн бодлого хэрэгжүүлэхээ  мэдэгдлээ.

УЛСЫН ИХ ХУРАЛ

УИХ баялаг бүтээгчидтэй хамтран “Өглөөний уулзалт” хийлээ

Монгол Улсын Их Хурал, Баялаг бүтээгчдийг дэмжих холбоо хамтран “Баялаг бүтээгч – өглөөний уулзалт”-ыг “Цар тахал ба эдийн засаг” сэдвийн дор зохион байгууллаа. Ийм уулзалтыг гурав дахь удаагаа зохиож байгаа нь энэ.  Өглөөний уулзалт дээр У3ИХ-ын дарга Г.Занданшатар “УИХ-аас цар тахлын үеийн эдийн засгийг эрчимжүүлэх, экспортыг нэмэгдүүлэх, импортыг орлох үндэсний үйлдвэрлэлийг дэмжих, төр-хувийн хэвшлийн түншлэлийг бэхжүүлэх, хөрөнгө оруулалтыг нэмэгдүүлэх хууль эрх зүйн орчныг бүрдүүлэхийн төлөө ажиллаж байгаа. Баялаг бүтээгчдээ дэмжих ажилд хамтран оролцож, шүүмжлэгч няцаагч биш, нэг зүгт харж, нэг бодлогоор бизнесийн орчноо хөгжүүлэх цаг болсон” хэмээгээд  Нэмүү өртөг шингээж байгаа үйлдвэрлэгчид бол жинхэнэ баялаг бүтээгчид гэдгийг онцоллоо.

УИХ  хөрөнгө оруулалтын эрх зүйн орчин, төр хувийн хэвшлийн түншлэлийг сайжруулах чиглэлээр Хөрөнгө оруулалтын тухай, Хөрөнгийн үнэлгээний тухай, Хөрөнгийн удирдлагын тухай, Төр, хувийн хэвшлийн түншлэлийн тухай, Худалдаа, аж үйлдвэрийн танхимын тухай, Мэргэжлийн холбоодын тухай, Зөвшөөрлийн тухай, Худалдааны тухай зэрэг бизнесийн эрх зүйн орчныг сайжруулах 15 хуулийн төслийг хэлэлцэхээр ажиллаж байна. Зарим нь өргөн баригдсан, зарим нь боловсруулалтын шатанд байгаа гэдгийг Улсын Их Хурлын дарга Г.Занданшатар хэллээ.

  

ЗАСГИЙН ГАЗАР

Лхагва гарагт Засгийн газрын ээлжит хуралдаан болж, дараах асуудлуудыг хэлэлцэн шийдвэрлэжээ.

Газрын асуудлыг нээлттэй болгоно

Авлигын индексийг бууруулах зорилго бүхий Ажлын хэсгийн ажлын явцын талаар танилцууллаа. Танилцуулгатай холбоотойгоор Ерөнхий сайд Л.Оюун-Эрдэнэ үүрэг өглөө.

Газрын албаны хүнд суртал, авилгатай холбоотой асуудлаар иргэдээс хамгийн олон гомдол, санал ирдэг. Энэ асуудалд онцгой анхаарч, газрын асуудлыг иргэдэд нээлттэй болгож, энэ оны аравдугаар сард багтаан цахим үйлчилгээнд шилжүүлэхийг даалгав. Ирэх долоо хоногийн Засгийн газрын хуралдаанаар цахимд шилжүүлэх бэлтгэл ажлын талаар танилцуулга хийхээр боллоо.

Гадаадын хөрөнгө оруулагчдын эрх ашгийг хамгаалах ажлын хэсэг байгууллаа

Мөн гадаадын хөрөнгө оруулагчдын эрх ашгийг хамгаалах ажлын хэсгийг байгуулахаар шийдвэрлэв. Тус ажлын хэсгийг Хууль, зүй дотоод хэргийн сайд Х.Нямбаатар ахална.

Гуравдугаар тунд хамруулах ажлыг эрчимжүүлнэ

Коронавируст халдварын цар тахлын нөхцөл байдал, хэрэгжүүлж буй арга хэмжээний талаар Эрүүл мэндийн сайд С.Энхболд танилцуулж, үйлчилгээний байгууллагуудтай хийсэн хариуцлагын гэрээг чанд мөрдүүлэх, олон нийтийг хамарсан арга хэмжээ, найр хурим хийхгүй байхад анхаарах хэрэгтэй байгааг сайд хэллээ.

Манай улсад вакцинжуулалт 65 хувьд хүрсэн. Гуравдугаар тунд 212 мянган хүн хамрагдаад байна. Оноос өмнө зорилтод бүлгийн иргэдийн 60 хувийг дархлаа сэргээх буюу гуравдугаар тунд хамруулахад анхаарч, вакцинцуулалтын цэгийг нэмэгдүүлэх нь зүйтэй гэв.

Төрийн өмчийн их, дээд сургуулиудыг нүүлгэнэ

Олон улсын түвшинд сургалтын чанараар хүлээн зөвшөөрөгдөх, үндэсний хэмжээнд тэргүүлэх их сургуулиудыг бий болгох зорилгоор нэн тэргүүнд төрийн өмчийн их, дээд сургуулиудыг “Сургалт-эрдэм шинжилгээ-үйлдвэрлэлийн цогцолбор” болгон орон нутагт үе шаттайгаар хөгжүүлнэ.

Үүнтэй холбогдуулан,

-Дархан-Уул аймаг дахь төрийн өмчийн их сургуулиудыг сургалт- судалгааны үйлдвэрлэлийн цогцолбор болгон хөгжүүлэх

-Орхон аймаг дахь технологийн сургуулийг инженер, технологийн чиглэлийн сургалт-судалгаа-үйлдвэрлэлийн цогцолбор болгон хөгжүүлэх

-Өмнөговь аймагт геологи, уул уурхай, технологийн чиглэлээр шинжлэх ухаан, технологийн их сургуулийн харьяа сургуулийг шинээр байгуулах асуудлыг судлахаар болов.

 НИЙГЭМ

Э.Оюунболд аварга цолоо хураалгаж, шинээр даян аварга төрөв

 Щрөнхийлөгч У.Хүрэлсүх Баасан гарагт зарлиг гаргаж Допинг хэрэглэсэн нь нотлогдсон Э.Оюунболдын  улсын аварга цолыг хурааж, барилдах эрхийг нь хоёр жилийн хугацаагаар хасчээ.

Үүнтэй холбоотойгоор Э.Оюунболдод 9-ийн даваанд унасан улсын аварга Н.Батсуурь даян аварга, 8-ын даваанд унасан улсын арслан Содномдорж “Үлэмж бадрах” чимэг, 7-ийн даваанд унасан Д.Анар “Улсын заан”, 6-ын даваанд унасан Б.Цэдэнсодном “Улсын харцага”, 5 даваанд унасан Н.Мустафа “Улсын начин” цолыг тус тус хүртжээ.

Мөн М.Бадарч “Улсын гарьд”, Ц.Одбаяр “Улсын заан”, Ц.Мөнхбаяр, Ш.Пүрэвгарьд, Б.Орхонбаяр нар “Улсын харцага”,  Б.Суманчулуун, Ц.Сангидорж нар  “Улсын начин” цолыг тус тус хүртэж байна.