"Time" сэтгүүлийн дэлхий нөлөө бүхий удирдагчаар нэрлэсэн Абдула Барадар амьд уу

Амьд эсэх нь тодорхойгүй байгаа  Талибан хөдөлгөөний удирдагчдын нэг Абдула Гани Барадарыг “Тайм” /Time/ сэтгүүл өчигдөр дэлхийн хамгийн нөлөө бүхий хүмүүсийн жагсаалтад оруулжээ. Тэрбээр хэдхэн хоногийн өмнө Талибуудын байгуулсан Хасан Ахундын  тэргүүлсэн Засгийн газрын нэгдүгээр орлогч сайдаар томилогдоод байсан юм.

Талибан”-ы улс төрийн жигүүрийн удирдагч Барадар нь Талибаны гадаад харилцаа, дипломат бодлогыг атгаж байсан  бөгөөд тэрбээр Катарын нийслэл Доха хотод АНУ-ын засаг захиргаатай хийх яриа хэлэлцээг ахалж, 2020 онд АНУ-ын  Ерөнхийлөгч Дональд Трамптай утсаар шууд харилцаж байжээ. Мөн 2021 оны хавар Афганистаны байдлыг зохицуулах зөвлөлдөх уулзалтад оролцохоор Москвад ирж байв.

Гэвч  өнгөрсөн долоо хоногт Талибчуудын байгуулсан Афганистаны шинэ засгийн газрын гишүүдийн дунд хагарал гарсан тухай албаны эх сурвалж мэдээлсэн. Тодруулбал, өнгөрсөн долоо хоногт болсон Засгийн газрын хуралдааны үеэр Барадар, Хаккани нар хоорондоо хатуу үг шидэлцэж, дэмжигчид нь мөн хуваагдан ширүүн маргалдсан байна. Талибчуудын ялалтад хэн гол гавьяа байгуулсан талаар тэдний хооронд маргаан үүссэн гэх мэдээлэл байгаа юм.

Энд нэр дурдагдаж байгаа Хаккани  бол  хагас бие даасан гэж үздэг “Хаккани сүлжээ” террорист байгууллагыг үүсгэн байгуулагч Желалуддина Хакканигийн хүү бөгөөд Америкийн тусгай албад эрэн сурвалжилж байсан гэх мэдээлэл бий. Гэвч тэр Талибын Засгийн газарт  дүрвэгчдийн асуудал хариуцсан сайд  болсон юм.

Засгийн газарт болсон дээрхи маргаанаас хойш тэргүүн шадар сайд  Барадар  нэг ч харагдаагүй бөгөөд хаана байгаа, амьд эсэх нь ч тодорхойгүй байна.  Үүний зэрэгцээ, Афганистаны нийгмийн сүлжээнд Барадарын амийг хөнөөсөн байж болзошгүй тухай мэдээлэл цацагдаж эхэлжээ.

Талибаны эх сурвалжууд түүнийг нийслэл Кабулаас Талибаны дээд удирдагчтай уулзахаар Кандагар хот руу явсан гэж мэдээлж байгаа бол зарим эх сурвалж зүгээр л “их ажиллаж ядарсан тул амрахаар явсан” гэжээ.

Түүнчлэн Ерөнхийлөгчийн ордонд Абдула Барадар, Цагаачлалын сайд Халил ар-Рахман Хаккани нарын хооронд зэвсэгт мөргөлдөөн болсон гэх мэдээлэл мөн байна.

Абдула Барадар Талибанчуудаас бүрдсэн шинэ Засгийн газрын эсрэг байр суурьтай байсан талаар Афганистаны “Спутник Афганистан” /Sputnik Afghanistan/ агентлаг мэдээлжээ. Тэрбээр бүх угсаатны бүлгийг Засгийн газрын бүрэлдэхэүүнд багтаах хүсэлтэй байсан ч дарамт шахалтын улмаас энэ хүслээ биелүүлж чадаагүй ажээ.

Пакистаны сэтгүүлч Ахмед Рашидын бичсэнээр мулла Барадар нь “Талбиан” хөдөлгөөнийг үүсгэн байгуулагчдын нэг бөгөөд бусдыг өөртөө татах увидастай, Талибанчуудын дунд хүндтэй нэгэн гэжээ.

Барадар нь Афганистаны хуучин Засгийн газрын гишүүдэд өршөөл үзүүлэх, хотын доторхи зах худалдаа эрхлэгчдийн тайван ажиллах нөхцлийг хангах  зэрэг эерэг шийдвэр гаргахад гол нөлөөлсөн хүн гэдэг.  Мөн  хөрш зэргэлдээ орших улс орнуудтай, тэр тусмаа Хятад, Пакистантай холбоо харилцаа тогтоох үүрэг гүйцэтгэсэн гэгдэж байгаа юм. Түүнийг “Афганистаны ирээдүйн тулгуур багана” хэмээн нэрлэдэг ажээ. Барадарыг одоогийн Засгийн газрын Батлан ​​хамгаалахын сайд Мухаммед Якуб их дэмждэг гэх мэдээлэл байдаг. Якуб бол “Талибан”-ыг үүсгэн байгуулагч мулла Омарын хүү юм. 

Намтар түүхээс нь харвал тэр пуштун үндэстэн, 1968 онд төрсөн, 53 настай. Оросуудын эсрэг дайнд оролцож явсан, 1994 ондТалибан хөдөлгөөнийг үүсгэн байгуулагчдын нэг, удирдагч  мулла Мухаммед Омартай ойрын хүний нэгээр нэрлэгдэж байжээ.