Гал түймэр, гамшгийн улмаас орон гэргүй болсон 12 өрхөд өргөө цагаан гэр өглөө

2021.09.06-ны өдөр Сүхбаатар аймгийн Түмэнцогт сумын нийтийн орон сууц болох 10-р байшинд гал гарч 12 өрхийн 55 иргэн орон гэргүй болсон билээ. Мөн 08-р сарын 23-нд тус сумын нутагт байгалийн гамшигт үзэгдэл болж 33 айл өрхийн хашаа хороо эвдэрч сүйдэн, 5 айл орон гэргүй болоод байсан юм. Өнгөрсөн хугацаанд Сүхбаатар аймгийн нутгийн зөвлөл болон Түмэнцогт сумын нутгийн зөвлөлийн санаачилгаар хандивын аян өрнөж орон гэргүй болсон 12 өрхөд өргөө цагаан гэр гардуулан өгчээ.

Зам, тээврийн хөгжлийн дэд сайд Ж.Бат-эрдэнэ: Сүхбаатарчууд тэр дотроо Түмэнцогтчууд маань зовлон тохиосон үед бие биендээ тусалдаг өгөөмөр, уужим сэтгэлтэй ард түмэн юм. Төрийн үндсэн үүрэг бол ард түмнийхээ амгалан тайван байдлыг хамгаалах, эрүүл аюулгүй орчинд амьдрах нөхцөлийг бүрдүүлэх байдаг. Бид амьдралын төгс шийдэж чадахгүй юм аа гэхэд амьдралд нь түлхэц болох орон гэрийг өнөөдөр өгч байна. Энд хүрэлцэн ирсэн бүх хүмүүст талархаж байна. Гал түймэр, байгалийн гамшгийн гашуун зовлонтой учирсан иргэд маань энэ өргөө цагаан гэрээ цаашид сайхан авч явж, үр хүүхдүүд ээ өсгөөсэй гэж хүсч байна.

Сүхбаатар аймгийн Түмэнцогт сумын засаг дарга Г.Энхтуяа: 2021.09.06-нд нийтийн орон сууц болох 10-р байшинд гал гарч 12 өрхийн 55 иргэн маань орон гэргүй болсон. Тухайн үед 10-р байшинд 6 өрхийн 31 иргэн амьдарч байсан юм. Галын улмаас хүний амь нас эрсдээгүй. Бид холбогдох мэргэжлийн байгууллагуудад хандаж гал юунаас болж гарав гэдгийг тодруулж байна. Мөн 08-р сарын 23-нд манай Түмэнцогт суманд гамшигт үзэгдэл болж 33 өрхийн 100 гаруй иргэн маань эд хөрөнгө, сэтгэл санаа, хашаа байшин гээд бүх зүйлээрээ хохирсон. Гамшгийн улмаас 5 өрх гэр оронгүй болсон. Энэ хүнд цаг үед орон гэргүй болсон иргэддээ туслахаар иргэд, аж ахуйн нэгж байгууллага, нутгийн зөвлөлийнхөн, Зам, тээврийн хөгжлийн дэд сайд Жалавсүрэнгийн Бат-Эрдэнэ идэвх санаачилгатай ажиллаж УОК-оор 12 гэр шийдүүлж өгсөнд баяртай байна.

Сүхбаатар аймгийн Түмэнцогт сумын ИТХ-ын дарга Э.Мөнхтулга: 2021.09.06-нд болсон гал түймрийн аюулд голцуу өрх толгойлсон амьдралтай эмэгтэйчүүд маань өртсөн. Улмаар Улсын онцгой комисс, Сүхбаатар аймгийн онцгой комисс гээд холбогдох газруудад хандсанаар 12 гэр хандив, тусламжаар бүрдэж өнөөдөр гэр оронгүй болсон ард иргэд дээ хүлээлгэн өгч байна.  Хандивын аянд нэгдсэн, санаачилгатай ажилласан хүн бүрт баярлалаа.

Сүхбаатар аймгийн Түмэнцогт сумын нутгийн зөвлөлийн дарга Н.Батсайхан: Сүхбаатарчууд нэгдэж чаддаг гэдгийг харуулсан томоохон хандивын аян болж өндөрлөлөө. Сүхбаатар аймгийн гаралтай бүх иргэд, аж ахуйн нэгж, байгууллага, Моннис групп, Төр засгийн түвшинд ажиллаж байгаа албан тушаалтнууд гар бие оролцож энэхүү үйл ажиллагааг өрнүүлж, зохион байгуулан ажиллалаа.

Сүхбаатар аймгийн Түмэнцогт сумын иргэн Б.Хишигсүрэн: Биднийг орон гэргүй болчхоод байхад туслалцаа үзүүлж байгаад үнэхээр баяртай байна. Сум орон нутгийнхан, Тамгын газрынхан болон та нөхөд дөө үр хүүхдүүдийнхээ өмнөөс, хамт олныхоо өмнөөс баярласан сэтгэлээ л илэрхийлье.

Сүхбаатар аймгийн Түмэнцогт сумын иргэн Б.Мөнхжаргал: Зам, тээврийн хөгжлийн дэд сайд Ж.Бат-Эрдэнэ, нутгийн зөвлөлийнхөн, нутгийн ард түмэндээ баярласнаа илэрхийлж байна. Өргөө цагаан гэртэй болгосонд баярлаж байна.

Сүхбаатар аймгийн Түмэнцогт сумын иргэн Н.Ганцэцэг: Нутгийн зон олондоо маш их баярлаж талархал илэрхийлж байна. Гэр өгч байгаа нутгийн зөвлөлийн эдгээр хүмүүс дээ маш их баярлалаа.

Сүхбаатар аймгийн Түмэнцогт сумын иргэн  Ц.Бямбаа: Дэд сайд Ж.Бат-Эрдэнэ болон дэмжлэг туслалцаа үзүүлсэн Түмэнцогтын сангийн аж ахуйн хамт олон, эмэгтэйчүүдийн зөвлөлийнхөн, нутгийн ард түмэндээ баярлалаа.

Г.Дугар