Монголчууд хүүхдийн баярыг өргөн дэлгэр тэмдэглэв. Энэ жилийн хувьд амралтын өдрүүд таарч, гурав хоног амарсан учраас ёстой л өргөн баярлацгаав. Гэхдээ сайны хажуугаар саар гэгчээр

Үндэсний статистикийн хорооноос гаргасан хүүхдийн гэмт хэрэг, насанд хүрээгүй охидын жирэмслэлт гээд олон тоонууд бид "хүүхдүүдийнхээ эрхийг хамгаалах" өдрөөр баярлаад, дарга нар мэндчилгээ дэвшүүлээд өнгөрдөг хэвээр.

Монголчуудыг залуучуудын орон гэдэг бас хүн ам цөөтэй улс.  Тэгвэл ийм залуу, цөөн хүн амтай улс орны хүүхдүүд нь гэмт хэргийн золиос болж, өвчнөөр нас барж, амиа хорлож, бэлгийн замын халдварт өвчин авч, сэтгэцийн эмгэгтэй болж, жирэмсэлж, төрж, хүчирхийлүүлсэн тоо баримтуудыг хараад хүн бүр нэгийг тунгааж үзээсэй. Бид алхам тутамдаа хүүхдүүдээ хамгаалж, эрүүл аюулгүй орчинд эрүүл саруул хүн болгон хүмүүжүүлэх үүргээ иргэн, төр, эцэг эхчүүд бид хийж чадаж байгаа юу гэдэгт хариулт өгөхүйц харуусалтай тоонуудыг доор дурдая.

НЭГ ЖИЛД 2868 ОХИН ЖИРЭМСЭЛЖЭЭ

Хамгийн харамсалтай нь насанд хүрээгүй охидын жирэмслэлт өмнөх жилүүдээс өссөн үзүүлэлттэй байгаа нь харамсмаар. Тодруулбал, 2025 онд 10-19 насны нийт 2868 охид жирэмсэлсэн нь өмнөх оноос 407 (16.5 хувь)-гоор нэмэгдсэн байна. Хамгийн бага нь арван настайдаа жирэмсэлжээ. Чихэр, зайрмаганд дурлаж, найзуудтайгаа өдөржин гадаа тоглохоос өөрийг хүсэхгүй насан дээрээ тэд жирэмсэн болж байгаа нь харуусал төрүүлмээр. Үүн дээр нэмээд охидын төрөлт 1000 хүнд ногдох өсвөр насны охидын төрөлтийн түвшин 14.7, үр хөндөлт 1000 хүнд ногдох өсвөр насны охидын үр хөндөлтийн түвшин 4 байгаа нь өмнөх онтой ижил түвшинд байна, 2025 онд 18 хүртэлх насны нийт 396 хүүхэд хүчиндэх гэмт хэргийн хохирогч болсон гэсэн аймшигтай тоо баримт байна. Эцэг эхчүүд, томчуудын үл хайхардаг, анзаардаггүй, ярилцдаггүй, хамгаалдаггүйгээс болж 2868 баяцхан охид сэтгэлдээ, биедээ том шарх, ачаа үүрчихэж.

45 ХҮҮХЭД АМИА ХОРЛОСНООС  5-9 НАСТАЙ НЭГ ХҮҮХЭД БАЙЖЭЭ

Зөвхөн 2025 онд гэмт хэргийн улмаас 119 хүхэд нас барсан байна. Энэ тоог өмнөх онтой харьцуулбал нэмэгдсэн үзүүлэлт гэж Үндэсний статистикийн хорооноос мэдээлжээ. Эрүүл мэндийн яамны 2025 оны мэдээллээр нийт 45 хүүхэд амиа хорлосон нь өмнөх оноос 17 тохиолдлоор буурсан байгаа ч насны хувьд   5-9 насны 1, 10-14 насны 11, 15-19 насны 33 хүүхэд 2025 онд амиа хорлосон байна.  Тэд юу ч үзэж харж, туулж үзээгүй, мөрөөдөлдөө л умбаж, хүслээ гүйцээх ёстой насан дээрээ энэ хорвоогоос уйдтал, амиа хорлотол нь томчууд бид юу хийсэн бэ. Мөн 24 хүүхэд хорих ангид ял эдэлж, эрх чөлөөгөө хязгаарлуулсан тоо байна. Томчууд бидний хэн нэгний буруутай үйлдлээс болж 2025 оны байдлаар Шүүхийн шийдвэр гүйцэтгэх ерөнхий газарт (ШШГЕГ) бүртгэгдсэн тэтгэлэг авах хүүхдийн тоо 19.7 мянга байгаа бол тэтгэлэг авч чадахгүй байгаа хүүхдийн тоо 8.8 мянга байна. Өмнөх онтой харьцуулахад тэтгэлэг авахаар ШШГЕГ-т бүртгүүлсэн хүүхэд 9.5 хувь, тэтгэлэг авч чадахгүй хүүхэд 3.1 хувиар нэмэгдсэн байна.

БЭЛГИЙН ЗАМЫН ХАЛДВАРТ ӨВЧИНТЭЙ 878, СЭТГЭЦИЙН ӨВЧЛӨЛТЭЙ 7638 ХҮҮХЭД БАЙНА

Ерөөсөө монголчууд бид хүүхдүүдээ хөсөр хаячихаж. 2025 оны байдлаар 10000 хүнд ногдох хүүхдийн зонхилон тохиолдох өвчлөлийг амьсгалын замын өвчин тэргүүлж байгаа бол амьсгалын замын тогтолцооны өвчлөл 2025 онд 3038 болж, өмнөх оноос 20-иор нэмэгджээ. Хүн амынх нь тал хувь нь амьдардаг нийслэлийн хүүхдүүд амьсгалын замын өвчнөөр хамгийн их өвчилдөг. Хүйтний улиралтай зэрэгцээд эмнэлгийн коридор бараадаж, хүүхдүүдээ эмчлэх оргүй болтлоо бид доройтож, дэлхийгээс хоцрогдсон. Мөн Эрүүл мэндийн яамны мэдээллээр 2025 онд 121.4 мянган хүүхэд шүдний цоорол өвчтэй байгаа нь өмнөх оноос 27.1 (28.8%) мянган хүүхдээр нэмэгдсэн бол бэлгийн замын халдварт өвчтэй 878 хүүхэд байгаа нь өмнөх оноос 92-оор нэмэгджээ. Бэлгийн замын өвчнүүдээс тэмбүүтэй 648 хүүхэд байгаа бол төрөлхийн тэмбүүтэй 25 хүүхэд байна.  Сэтгэцийн эрүүл мэндийн үндэсний төвд 2025 онд 318 хүүхэд хэвтэн эмчлүүлсэн байна. Харин Эрүүл мэндийн хөгжлийн төв (ЭМХТ)-ийн мэдээллээр 2025 онд 0-14 насны сэтгэцийн өвчлөлтэй 7638 хүүхэд бүртгэгдсэн байна. Монгол Улсад 0-17 насны 13,161 хөгжлийн бэрхшээлтэй хүүхэд байгаагийн 61.1 хувь нь эрэгтэй, 38.9 хувь нь эмэгтэй хүүхэд байна. Хөгжлийн бэрхшээлтэй хүүхдийн тоо өмнөх оноос 785 (6.3%)-аар өссөн байна.

Ийм л халагламаар, харамсмаар тоонууд бидний дунд байна. Тэгвэл томчууд бид дахин нэг ч хүүхэд өвтгөхгүй, амиа хорлохгүй, хүчирхийлүүлэхгүй, нас барахгүй, жирэмслэхгүй, хоригдохгүй байхын тулд ЮУ ХИЙЖ ЧАДАХ ВЭ?

Яг одоо энэ асуултыг та өөрөөсөө, өөрийнхөө эргэн тойрны томчуудаас заавал асууж, дараа жилийн хүүхдийн баяраар энэ аймшигтай тоонуудыг бууруулахын тулд БИ ЮУ ХИЙСЭН БЭ? гэдэг асуултыг ч өөрөөсөө асуугаарай.