Сүүлийн үед олонхийг бүрдүүлж буй Ардын намынхан хийх ажилгүй, талцал хуваагдлаа шийдэж чадахгүй, хүний намын дотоод асуудалд санаа тавих болжээ. Ялангуяа УИХ-ын гишүүдэд хууль санаачлах, ард түмнийхээ төлөө ямар хууль эрх зүйн орчин дутагдалтай байгаа, батлагдсан хуулиуд нь амьдралд хэрэгтэй байгаа эсэх, 38/30-аараа хуваагдчихаад байгаа намынхаа дотоод асуудалдаа анхаарахгүй байж Ардчилсан намын дотоод сонгууль, Ардчилсан намын генсекийг муучлах гээд байнгын хорооны хуралдааныг будилуулаад сууж байх. Угтаа бол төр барьж байгаа МАН өөрсдөө хоёр хуваагдчихсан, төрийн албыг төрлийн алба шиг эзэгнэчихсэн учраас төрийн бүх шатанд ч Ардын намын хагарал, хуваагдал нөлөөлж, ажил явахаа болсныг амтай болгон ярьж байхад өөрийнхөө толгой дээрх бухлыг харахгүй өрөөлийн толгой дээрх өвсийг хараад бүхэл бүтэн байнгын хорооны хуралдааныг өрөөлийн намынхаа асуудлыг чухал асуудал болгон хувиргаж суугаа нь гайхаш төрүүлмээр.

Намынхаа удирдлагуудаас болоод хоёр хуваагдчихаад нэг хэсэг нь эрх ямбаа эдлээд нэг хэсэг нь нөгөөхөө боорлоод завгүй явахад намын ах нар нь далдуур тохиролцоод ирэхээр муу л бол хойд талын хар овоохой гэдэг шиг Ардчилсан намын дотоод асуудал руу орж, боргож сууна.

УИХ-ын гишүүдэд хийх ажил гэж бий. Сонгогдсон тойргийнхоо асуудлыг ярих, хууль санаачлах, улс орны асуудалд анхаарч хууль эрх зүйн орчныг яаж сайжруулах, Засгийн газрынхаа ажилд хяналт тавих гээд тоймгүй олон ажил байдаг. Гэхдээ Ардын намынхан хийх ажилгүй болж, өөрсдөө учраа олохгүй байж Ардчилсан намын гүйдэлд санаа зовниж суух завтай  бөгөөд захиалгатай л явна.

Яг үнэндээ Ардчилсан нам бол дотоод ардчилалтай, хэдэн бүлэг фракцтай, түүнийг нь хэн толгойлдог, намын удирдлагууд фракциудынхаа эрх ашгийг яаж хангадаг гээд бүх зүйл нь олон нийтийн өмнө нээлттэй бөгөөд ил тод. Тэд хоорондоо "үзэхдээ" ч олны өмнө байдаг. Харин Ардын намынхан өнөөдөр хэдэн бүлэг фракцтай, тэр бүлэг фракцийг хэн толгойлж, ил далдаар хэн төр удирдаж байгаа нь хаалттай бөгөөд хэзээ ч ярьдаггүй, намын гишүүд нь айгаад хэлж чаддагүй тийм л нам.

Тэгээд ч Ардчилсан нам засаг бариагүй,  тэд дотоод сонгуулиа л хийж буй.

Ардын намынханд хаяглахад, Ардчилсан нам эвтэй, хүчтэй байх нь танай намынханд төдийгүй хэсэг бүлэг хүмүүст айдас төрүүлээд байгаа бол эрх барьж байгаа нам дотроо эв түнжигээ олоод ирэх сонгуульд Ардчилсан намтай үзэлцээд ард түмнээрээ дүнгээ тавиулчих. Ардын намынханд бусад намын дотоод асуудалд анхаарлаа хандуултлаа эрх мэдэл, бяр цээжинд нь амтагдаад байгаа бололтой.

Ард түмэн нүдтэй, чихтэй, учир мэддэг л болсон доо, Ардын намынхан минь.

Т.ОД